VERKSMIÐJAN

2011-09-22T06:05:00.000-07:00

Síðustu helgina í september verður haldin Ljóðahátíð í Eyjafirði.
Aðstandendur hennar eru Verksmiðjan á Hjalteyri, Populus tremula og
Skógræktarfélag Eyfirðinga.

Hin árlega Ljóðaganga í Eyfirskum skógi verður að þessu sinni hluti
hátíðarinnar og nú haldin í Grundarskógi í Eyjafirði.

Dagskrá verður þríþætt eins og fram kemur hér að neðan. Hópur góðskálda
heimsækir Eyjafjörð og les ljóð sín fyrir heimamenn og gesti.

Fram munu koma m.a. eftirtalin skáld:

Guðbrandur Siglaugsson
Anton Helgi Jónsson
Kristín Svava Tómasdóttir
Bjarni Gunnarsson
Þórunn Erlu Valdimarsdóttir
Ísak Harðarson

Fyrst verður ljóðakvöld í Verksmðjunni á Hjalteyri kl. 21.00 föstudaginn 23. sept.

Síðan Ljóðaganga Grundarskógi í Eyjafirði kl. 14.00 laugardaginn 24. sept.

Að lokum ljóðakvöld í Populus tremula sama kvöld kl. 21.00.

Aðgangur verður ókeypis og öllum heimill. Malpokar leyfðir.

Ljóðahátíðin er styrkt sérstaklega af Menningarráði Eyþings, Uppheimum og
Amtsbókasafninu á Akureyri.

2011-09-08T08:06:00.000-07:00

Reynsla er Þekking
George Hollanders / Sharka Mrnakova / Birgit Ehrhardt
Verksmiðjan á Hjalteyri
10. - 25. september 2011

Opnun laugardaginn 10. september kl. 14
Opið laugardaga og sunnudaga kl. 14-17 og eftir samkomulagi 892 6804

https://www.facebook.com/event.php?eid=153838708036850

Sýningin Reynsla er Þekking er lífandi og listræn framsetning sem beinir athygli að eko- og útikennslu í leikskólum, náttúrulegum leikgörðum og áhrifum þeirra á þroska fólks - bæði andlegan og líkamlegan. Þetta er einskonar hugleiðsla um óhefðbundnar kennsluaðferðir sem byggja á "experiential learning".

Miðpunkturinn er manneskjan, skilningarvit hennar, tengslin við náttúruna, náttúrulögmál, staðbundnar atvinnugreinar, auðlindir, menningararfleifðin, samfélagið og sjalfbærir lífnaðarhættir.
Sýningin mun standa frá 10. til 25. September 2011 í Verksmiðjunni á Hjalteyri.

Náttúrulegir leikvellir er gerðir úr náttúrulegu eða endurunnu hráefni eða hlutum. Heildrænt umhverfi sem þessar leikgarðar mynda, miðar að því að örva skilningarvit barnanna og fólks og færa þau nær náttúrunni og samfélaginu sem þau búa í.

Sýningin er margþætt og er samstarfsverkefni Sharka Mrnakova, George Hollanders og Birgit Ehrhardt.

Meðal þess sem verður sýnt er:
Afrakstur af þróunarverkefni um útikennslu sem var unnið í sumar í samstarfi við leikskólann Iðavelli á Akureyri. Þar voru elstu börnin úti alla daga frá júni og fram í miðjan júli á nærliggjandi leikvelli og unnu í anda úti leikskóla. Unnið var með náttúruleg og endurunnin hráefni, menningararfleifðinna s.s. sögur og staðbundna starfshætti, skilningarvitin, náttúrulögmál og element svo eitthvað sé nefnt. Einnig var unnið með órjúfanleg tengsl manneskjunnar og náttúrunnar með því að leggja áhersla á sjálfbæra lifnaðarhætti, endurvinnslu og náttúruvernd í gegnum daglegt starf eða upplifun og fræðslu.

Sýnt verður bland af verkefnum barnanna en einnig gögnum sem leikskólakennara söfnuðu saman s.s. upptökur (hljóð og myndbönd), ljósmyndir og fleira.

Einnig verða til sýnis hönnunarferli og uppbygging í samvinnu við foreldra frá náttúralegum leikgarði sem varð til við Krílakot í sumar til að gefa innsýn í hugmyndfræði á bak við þessa tegund af leikgörðum.
Til sýnis verða aðferðir og óhefbundnar leiðir til að endurnýta sorp eða úrgang við kennslu í leikskólum eða fræðsluaðferðir.

Ýmsar innsetningar leika sér að skilningarvitum gesta og gangandi og eru gagnvirk til að gefa dýpri innsýn í eigin reynsluheim og hugmyndafræðina á bak við náttúrulega leikgarða og "experiential learning". Einnig eru til staðar gagnvirkt vinnusvæði þar sem gestir og gangandi geta tekið þátt í og skapað sína eigin hugarsmíð.

Á sýningunni er einnig ítarleg kynning um eko- eða úti leikskóla og náttúrulega leikgarða.

Menningarráð Eyþings er stuðningsaðili sýningarinnar.

George Hollanders & Sharka Mrnakova
Nánari upplýsingar veitir George i síma 892 6804

2011-07-26T16:00:00.000-07:00

KVELDÚLFUR – sjónsuða
Verksmiðjan á Hjalteyri fyllist af lífi næstkomandi laugardag, þann 30. júlí, þegar sýningin Kveldúlfur - sjónsuða verður opnuð. Þetta er samsýning nokkurra ungra
myndlistarmanna og hönnuða sem flest eiga það sameiginlegt að hafa tiltölulega nýlokið listnámi sínu.

Listamennirnir sem eiga verk á sýningunni eru:

Baldvin Einarsson
Bergur Anderson
Bryndís Björnsdóttir
Darri Úlfsson
Elísabet Brynhildardóttir
Ingvar Högni Ragnarsson
Katla Rós
Klængur Gunnarsson
Lilja Birgisdóttir
Loji Höskuldsson
Ragnar Már Nikulásson
Selma Hreggviðsdóttir
Sindri Snær S. Leifsson
Þórgunnur Oddsdóttir

Sýningin verður opnuð kl. 15 á laugardaginn. Svo kemur kveldúlfur í mannskapinn og kl. 21 hefst dagskrá með tónlist og gjörningum í verksmiðjunni. Meðal listamanna sem þar koma fram eru Unnur Andrea Einarsdóttir og hljómsveitin Indigo. Og sviðið verður opið fyrir þá sem vilja troða upp.

Sýningin Kveldúlfur – sjónsuða stendur yfir frá 30. júlí til 21. ágúst 2011.
Nánari upplýsingar um sýninguna veitir Selma Hreggviðsdóttir í síma 868 9720

Verksmiðjan á Hjalteyri er opin um helgar milli klukkan 14 og 17.

Um sýninguna:
Það er Verslunarmannahelgi og við leggjum land undir fót, nokkrir myndlistarmenn og hönnuðir með svefnpoka, dýnur og fullan haus af hugmyndum.

Þó ekki svo fullan að það sé ekki pláss fyrir eins og eina Hjalteyri þar.

Hún þarf að komast inn í höfuðið líka.
Það er mikilvægt.

Við mætum á staðinn, grúskum og sjóðum. Hver og einn með sína verksmiðju í höfðinu. Og við vinnum líka saman. Samskipti verða efniviður.

Svo kemur í okkur kveldúlfur. Við bjóðum fleirum að taka þátt. Sláum upp hátíð þegar kvöldar með tónlist og guð má vita hverju.

Uppi á palli, inn í tjaldi, vonandi skemmtiði ykkur vel.

Menningarráð Eyþings, Hörgársveit, Ásprent, Tengir, Norðurorka og Kaldi styrkja Verksmiðjuna á Hjalteyri.

2011-07-19T06:42:00.001-07:00

Verksmiðjan á Hjalteyri

Fréttatilkynning

Uppáhaldslög

Kristján Pétur Sigurðsson verður með tónleika í Verksmiðjunni á Hjalteyri laugardagskvöldið 23. júlí og hefjast þeir kl. 20:30.
Flutt verða nokkur uppáhaldslög eftir bæði Kristján Pétur og aðra. Húsið mun sjá um hljóðmögnun. Sérlegir aðstoðarmenn eru Guðmundur Egill Erlendsson og Birgir Sigurðsson. Aðgangur er ókeypis.
Hér er hægt að skrá sig á viðburðinn á facebook: https://www.facebook.com/event.php?eid=222566907785635

Nánari upplýsingar veitir Kristján Pétur í síma 895 9546 og í strandkp@simnet.is

Síðustu forvöð eru svo að sjá sýninguna Innsýn í Verksmiðjunni á Hjalteyri um helgina. Sýnendur eru Eygló Harðardóttir, Guðjón Ketilsson, Guðrún Pálína Guðmundsdóttir, Joris Rademaker og Jón Laxdal.
Joris Rademaker er sýningarstjóri og hann valdi fjóra listamenn með sér til að vinna frjálslega með hugmyndir sem tengjast að einhverju leiti starfsemi Verksmiðjunnar og rými hússins. Á sýningunni eru skúlptúrar, málverk, veggmálverk og innsetningar.
Verksmiðjan er styrkt af Eyþingi.

Sýningin er opin laugardaga og sunnudaga milli kl. 14.00 - 17.00 og einnig á meðan tónleikar Kristjáns Péturs standa yfir.

DAGSKRÁ 2011

2011-06-29T02:40:00.001-07:00

2011-06-27T06:59:00.001-07:00

Verksmiðjan á Hjalteyri

Fréttatilkynning

Innsýn

Eygló Harðardóttir
Guðjón Ketilsson
Guðrún Pálína Guðmundsdóttir
Joris Rademaker
Jón Laxdal

2. - 24. júlí 2011

Laugardaginn 2. júlí kl. 15.00 opnar sýningin Innsýn í Verksmiðjunni á Hjalteyri. Sýnendur eru Eygló Harðardóttir, Guðjón Ketilsson, Guðrún Pálína Guðmundsdóttir, Joris Rademaker og Jón Laxdal.
Joris Rademaker er sýningarstjóri og hefur valið fjóra listamenn með sér til að vinna frjálslega með hugmyndir sem tengjast að einhverju leiti starfsemi Verksmiðjunnar og rými hússins. Á sýningunni verða skúlptúrar, málverk, veggmálverk og innsetningar.
Sýningin er styrkt af Eyþingi.

Sýningin er opin laugardaga og sunnudaga milli kl. 14.00 - 17.00.
Síðasti sýningardagurinn er 24. júlí.

Nánari upplýsingar veitir Joris Rademaker í síma 462 7818 og Guðrún Pálína í gudrunpalina@hotmail.com

2011-06-07T08:35:00.001-07:00

FRÉTTATYLKYNNING

8:45 að bandarískum tíma ...
12:45 að íslenskum tíma ...

þúsundir létu lífið

við skulum biðja um betri heim

biðja
nógu
nógu
heitt

máttur bæna hefur verið sannaður

Ástarsetningar í Verksmiðjunni á Hjalteyri

Laugardaginn 11. júní kl. 20.00 flytja Margrét Lóa Jónsdóttir skáldkona og Páll B. Szabo tónlistarmaður frumsamið tónverk Páls við ljóð Margrétar úr bókinni Tímasetningar.

Þetta er fyrsti viðburðurinn í Verksmiðjunni þetta sumarið en dagskrána í heild sinni má sjá á bloggsíðunni: www.verksmidjan.blogspot.is
Verksmiðjan er opin um helgar frá kl.14.til 17.
Hægt er að skoða Ljóðainnsetninguna Ástarsetningar á þeim tíma, hún stendur til 26 júní.

HJÓLABRETTAFÉLAG AKUREYRAR

2010-09-08T02:11:00.000-07:00

Verksmiðjan á Hjalteyri

Setningarhátíð Hjólabrettafélags Akureyrar
11. – 12. september 2010
Laugardaginn 11. septeber kl. 13:00 og fram eftir degi
Sunnudaginn 12. septeber kl. 13:00 og fram eftir degi
verksmidjan.blogspot.com
http://www.facebook.com/event.php?eid=147755401912876

Setningarhátíð Hjólabrettafélags Akureyrar verður haldin í Verksmiðjunni á Hjalteyri laugardaginn 11. september. Hátíðin/Sessionið byrjar kl 13:00 og verður eitthvað fram eftir degi.
Á staðnum verða pallar, rail, box og fullt af dóti til að renna sér á.
Markmið félagsins er að kveikja aðeins í bæjaryfirvöldum/sveitarstjórnum og sýna hvað þessi íþrótt er stór hérna á Akureyri og í nágrenni.
Við verðum með undirskriftalista fyrir innanhúss aðstöðu hjólabrettamanna á Akureyri á staðnum og vonum að sem flestir sýni okkur stuðning.
Opið fyrir alla og endilega komið með sem flesta til að sýna stuðning.
Á staðnum verða sýndar brettaljósmyndir og myndbönd
Komið og deilið góðum tíma áður en veturinn skellur á!

Nýstofnað Hjólabrettafélag Akureyrar
Nánari upplýsingar veitir Elvar Örn Egilsson, formaður Hjólabrettafélagsins 6163044

Menningarráð Eyþings styrkir Verksmiðjuna á Hjalteyri.

2010-07-28T12:20:00.000-07:00

Verksmiðjan á Hjalteyri

Finnur Keli Kristján?
31. júlí – 5. september 2010
Opnun laugardaginn 31. júlí kl. 16:00
Opið um helgar frá kl. 14 - 17
facebook.com/pages/Verksmidjan-a-Hjalteyri/92671772828?ref=ts

Finnur Arnar, Kristján Steingrímur og Þorkell Atlason

Laugardaginn 31. júlí verður opnuð sýningin "Finnur Keli Kristján ?" í Verksmiðjunni á Hjalteyri.
Sýningin er samvinnuverkefni myndlistarmannanna Finns Arnar, Kristjáns Steingríms og tónskáldsins Þorkels Atlasonar.
Listamennirnir, sem eru búsettir á höfuðborgarsvæðinu, lögðu land undir fót á húsbíl norður á Hjalteyri viku fyrir opnunina og settu upp sýninguna úr efnis- og hljóðheimi staðarins.
Á opnun verður fluttur gjörningur.
Sýningin stendur frá 31. júlí til 5. september og verður opin um helgar frá 14 - 17. Á virkum dögum er hægt að hafa samband í síma 692 7450 til að skoða sýninguna.
Nánari upplýsingar veitir Finnur Arnar í síma 899 5590 og Kristján Steingrímur í kristjan@lhi.is

Menningarráð Eyþings styrkir Verksmiðjuna á Hjalteyri.
Þessi tilkynning er einnig á http://mynd.blog.is/blog/mynd/entry/1080711

REIMLEIKAR-HÚSLESTUR FRÁ 20. ÖLD

2010-07-20T04:11:00.000-07:00

Reimleikar – húslestur frá 20. öld

Um helgina verður ljóðasýningin Reimleikar sett upp í Verksmiðjunni. Sýningin stendur yfir eina helgi frá 23. til 25. júlí. Á sýningunni er ljósi brugðið á íslenska ljóðlist, upptökur og upplestur. Þar sem gefnar hafa verið út á Íslandi með upplestri ljóðskálda, og þær settar upp til spilunar. Sýningin er í grunninn bókmenntasöguleg. Hægt verður að hlusta á skáld og skáldskap frá ólíkum tímabilum og hlusta sig þannig í gegnum íslenska ljóðlist 20. aldar. Sýningin býr einnig yfir mörgum lögum: hægt er að njóta raddanna og bera saman raddblæ skáldanna, hægt er að njóta ljóðanna, hægt er að njóta sögunnar sem býr í útgáfunni og upptökutækninni. Á endanum stendur áheyrandinn líka frammi fyrir spurningum um eðli upptökunnar og hins talaða orðs. Verksmiðjan sjálf á Hjalteyri skiptir sköpum fyrir sýninguna, tilkomumikill hljómburður hússins skapar sýningunni einstaka umgjörð. Enginn fær notið upplesturs sem hefur verið upptekinn, nema hann fari fram í húsi sem hæfir. Verksmiðjan er fullkomlega eyðilegur staður - hún leyfir fólki að hlusta eitt, sér og út af fyrir sig, þótt allir fái notið ljóðlistarinnar í sameiningu. Sýningin er önnur í röðinni af þremur sýningum sem tengjast bókmenningu og margmiðlun. Jóna Hlíf Halldórsdóttir og Hjálmar Stefán Brynjólfsson setja upp sýninguna. Áður hafa þau dansað á mörkum bókmennta og myndlistar í sýningunni Bráðum – áminning um möguleika gleymskunnar sem sett var upp í nóvember 2009 í GalleríBOX. Síðasta sýningin fer fram árið 2011. Athugið: aðeins þessi eina helgi.

GjöRNINGAHELGI

2010-07-08T17:22:00.000-07:00

Dieter Roth Akademían

2010-06-14T23:14:00.000-07:00

2010-06-14T13:24:00.001-07:00

Dieter Roth Akademían í Verksmiðjunni á Hjalteyri 5. og 6. júní 2010.

Dieter Roth Akademían (DRA), var stofnuð í minningu Svissnesk/þýska listamannsins Dieter Roth í maí árið 2000, tveimur árum eftir að hann lést.
Upphaflega voru það vinir, samstarfsmenn og fjölskylda Dieter Roth sem komu saman og ákváðu að láta hugmyndir hans um akademíu verða að veruleika. Samtök eða félagsskap þar sem listamenn og annað gott fólk kæmi saman, sýndu verkin sín, hjálpuðust að, miðluðu þekkingu og létu almennt gott af sér leiða.
Stofnendurnir/prófessorarnir bjóða öðrum listamönnum þátttöku ýmist sem nemendum eða prófessorum, allt eftir reynslu þeirra og þekkingu.
Akademían er ekki stofnun og hefur engan rekstur og enga skriffinnsku. Það má kalla það fyrstu lexíuna í akademíunni að alla skipulagningu og pappírsvinnu sem fylgir því að komast í samband við prófessorana víða um heim verða nemendur að sjá um sjálfir.
Í dag eru nokkrir tugir meðlima í DRA. víða um Evrópu, í Kína, Ungverjalandi, Íslandi og Nýju Mexíkó, sem hittast árlega og halda ráðstefnu um listir.
Samfara ráðstefnunum eru myndlistasýningar, fyrirlestrar, gjörningar og listasmiðjur. Þungamiðjan í öllu saman eru verk Dieter Roth, heimspeki hans og lífskraftur.

Dieter Roth kom eins og stormsveipur inn í heim íslenskrar menningar í lok 6. áratugarins þegar hann settist að í Reykjavík ásamt barnsmóður sinni Sigríði Björnsdóttur.  Dieter tók að sér að kenna við Myndlistaskólann í Reykjavík fyrir tilstilli Ragnars Kjartanssonar myndhöggvara sem þá var skólastjóri. Starf Dieters við skólann hafði mikil áhrif á þá listamenn og kennara við skólann sem kynntust honum og hugmyndum hans.

Áhrifa verka og hugmynda Dieters Roth á Íslandi urðu margvísleg og afgerandi,
ekki síst ásviði myndlistar og hönnunar. Sér raunar ekki fyrir endann á þeim
áhrifum, eins og kom fram í því að á Listahátíð í Reykjavík 2005 var sérstök
áhersla á samtímamyndlist. Ber þar helst að nefna viðamikla sýningu á verkum
Dieter Roth í þremur listasöfnum; Listasafni Reykjavíkur, Listasafni Íslands og
Gallerí 100° en sýningin þar var í samvinnu við Nýlistasafnið.

Svissnesk/þýski listamaðurinn Dieter Roth átti heimili sitt á Íslandi frá sjötta áratug síðustu aldar. Svo vill til að hann starfaði um tíma hjá prentsmiðju Odds Björnssonar á Akureyri, en Oddur var ættingi Sigríðar eiginkonu Dieters og barnsmóður.

Dieter Roth akademían á sér sterkar rætur á Íslandi og hefur fjölmörgum nemendum verið boðin þátttaka. Árlega fer Listaháskóli Íslands með nemendur í vinnubúðir á Seyðisfjörð undir leiðsögn Björns Roth og Kristjáns Steingríms Jónssonar. Öllu því fólki býðst þátttaka.

Verksmiðjan á Hjalteyri hefur boðið DRA. að halda sína 11. ráðstefnu og sýningu, 5. júní – 18. júlí 2010.
Verksmiðjan er opin laugardaga og sunnudaga kl. 14.00 - 17.00
www.verksmidjan.blogspot.com
www.facebook.com/pages/Verksmidjan-a-Hjalteyri/92671772828?ref=ts

Fyrir allar nánari upplýsingar hafið samband við

Aðalheiði S. Eysteinsdóttur í síma 865 5091, fyrir norðan adalheidur@freyjulundur.is

Björn Roth í síma 894 0007, er í Reykjavík þriðjudag og fyrripart miðvikudags.

Jan Voss, í Amsterdam, sími 003120-6390507, boewoe@xs4all.nl

Laugardagur 5. júní
kl.14.00-17.00 opnun sýningar Dieter Roth akademíunnar.
kl. 14.30 Uppákoma - Halldór Ásgeirsson - Hraunbræðsla. 
kl. 15.30 Uppákoma – Martin Engles - Leiklestur.

Sunnudagur 6. júní
kl. 14.00 Erindi - Vilborg Dagbjartsdóttir- Kynni af Roth fjölskyldunni.
kl. 15.00 Gunnhildur Hauksdóttir – uppákoma.
kl. 16.00 Ráðstefna DRA.

Þáttökulisti DRA

Elín Anna Þórisdóttir
Ann Noël
Malcom Green
Birta Jóhannesdóttir
Karl Roth
Solveig Thoroddsen
Þórarinn Ingi Jónsson
Jeannette Castioni
Harpa Björnsdóttir
Aðalheiður S. Eysteinsdóttir
Magnús Árnason
Finnur Arnar
Gunnhildur Hauksdóttir
Arnar Ómarsson
Andrea Tippel
Erika Streit
Rut Himmelsbach
Rúna Þorkelsdóttir
Henriëtte Van Egten
Jan Voss
Sigríður Björnsdóttir
Dadi Wirz
Kristján Guðmundsson
Björn Roth
Oddur Roth
Þórarinn Blöndal
Íris Ólöf Sigurjónsdóttir
Sigríður Torfadóttir Tulinius
Martin Engler
Vilborg Dagbjartsdóttir
Gunnar Már Pétursson
Martijn Last
Gunnar Helgason
Avanti Ósk Pétursdóttir
Pétur Kristjánsson
Eggert Einarsson
Beat Keusch
Gertrud Otterbeck
Reiner Pretzell
Einar Roth
Steinunn Svavarsdóttir
Þórunn Svavarsdóttir
Halldór Ásgeirsson
Aðalheiður Borgþórsdóttir
Ásgeir Skúlason

ANNA RICHARDS

2010-05-11T03:26:00.000-07:00

Dansgjörningurinn “Sláturhús hjartans” í Verksmiðjunni á Hjalteyri

Laugardaginn 15. maí n.k. verður frumfluttur dansgjörningurinn “Sláturhús hjartans” í listrými Verksmiðjunnar á Hjalteyri við Eyjafjörð. Sýningin hefst kl. 17:00.
Höfundar verksins eru Anna Richards dansgjörningalistakona og Sigurbjörg Eiðsdóttir myndlistakona.

Flytjandi verksins er Anna Richards en í verkinu koma fram, auk Önnu, Hallgrímur J. Ingvason tónlistamaður, Helga Rós Indriðadóttir sópransöngkona, Sigurður Hólm Sæmundsson björgunarsveitamaður og Karlakór Dalvíkur undir stjórn Guðmundar Óla Gunnarssonar. Flytjandi verksins er Anna Richards en í verkinu koma fram, auk Önnu, Hallgrímur J. Ingvason tónlistamaður, Helga Rós Indriðadóttir sópransöngkona, Sigurður Hólm Sæmundsson björgunarsveitamaður og Karlakór Dalvíkur undir stjórn Guðmundar Óla Gunnarssonar. Sviðsstýra og ljósmóðir verksins er Lene Zachariassen.

Í verkinu er fjallað um ferðalag mannveru innan völundarhúss hjarta síns og þau átök sem þar eiga sér stað og leiða hana í gegnum ferli ástríðna, uppgjafar, ótta, skilnings og umbreytinga.

Umgjörð verksins er unnin inn í rými gömlu síldarbræðslunnar á Hjalteyri og er áhorfendum frjálst að færa sig til í rýminu á meðan á flutningi verksins stendur því einnig er hægt að fylgjast með verkinu af annarri hæð hússins.
Tónlist í verkinu er að hluta frumsamin og flutt sem spunaverk þar sem dansari og tónlistarmenn spinna saman.

Rúta fer frá Listasafninu á Akureyri kl. 16:30
Enginn aðgangseyrir.
Kaffi Lísa á Hjalteyri er opið.

Verkið hlaut styrk frá Leiklistarráði Íslands og Menntamálaráðuneyti 2010 og frá Menningarráði Eyþings.

www.verksmidjan.blogspot.com

Nánari upplýsingar gefur Anna í síma 863 1696

http://www.facebook.com/pages/Verksmidjan-a-Hjalteyri/92671772828?ref=ts

2010-01-04T04:40:00.000-08:00

Laugardaginn 12 des kl.17:00 verður sýning opnuð á nokkrum
“myrkraverkum” þeirra Gústavs Geirs Bollasonar, Þórarins Blöndal, Florence Lucas, Roland Moreau
og Vincent Chhim í Verksmiðjunni á Hjalteyri og er yfirskrift sýningarinnar Zombí.

Þar í skammdeginu munu flóðgáttir ímyndunarinnar opnast og henni verða
allir vegir færir, því hér er nánar tiltekið um að ræða sýningu á og í myrkri, þar sem
tekist er á við myrkrið og ógnir þess sem upplifun, ekki í neinum
skilgreindum listrænum tilgangi heldur mun frekar sem hríslandi
skemmtun fyrir fólk á öllum aldri.
Í tímans rás hefur goðsögnin um Zombí tekið á sig nokkrar mismunandi
myndir og merkingar. Við þekkjum öll uppvakninginn, hinn íslenska
Þorgeirsbola sem og aðrar skuggaverur, miður viðkunnanlega náunga sem
hér voru sendir af kunnáttumönnum á milli landsfjórðunga.
Spurst hefur til hans víða um heiminn og ef ekki dauðum og
upprisnum, þegjandalegum, ráfandi um ankannalegur í göngulagi í erindum
eiganda síns, þá alla veganna sem hugsana og viljalausu verkfæri í
hans höndum. Á seinni tímum hefur mest borið á honum í teiknisögum og
kvikmyndum. Þar fer hann gjarnan um stjórnlaus, í sístækkandi hópum
sísvangra og fáránlegra mannskrímsla sem hungrar helst í kjötið af
samborgurum sínum og stefnir örvita að endalokum siðmenningar og
heimsendi.
En það er ekki síst hinn „heimspekilegi“ Zombí sem hér ræður titli,
hann mun vera lítt meðvitaður og hugsanalaus sem þó kann að haga sér
og lítur út fyrir að vera venjuleg manneskja.

Verkin á sýningunni samanstanda af hljóðverki, innsetningu og
teikningum, á sýningartímabilinu verða nokkrir
viðburðir og verða þeir auglýstir síðar. Sýningin stendur til 10. janúar
og verður opið laugardaga og sunnudaga milli kl. 16:00 og 18:00.

TÓNLISTAGJÖRNINGUR

2009-08-19T23:58:00.000-07:00

Tónlistargjörningur verður framinn í Verksmiðjunni á Hjalteyri á föstudagskvöld, 21. ágúst, kl. 21.00. Meiningin er að breyta gömlu síldarverksmiðjunni í hljóðfæri og nota til þess raddir söngfólksins í kammerkórnum Hymnodiu, ýmiss konar slagverk Hjörleifs Arnar Jónssonar, gamalt orgel harmóníum í eigu Eyþórs Inga Jónssonar og fiðlu Láru Sóleyjar Jóhannsdóttur. Flutt verða sígild og alþekkt lög en sannarlega í óvenjulegum og nýstárlegum búningi. Fólki er bent á að koma hlýlega klætt því svalt er í verksmiðjunni. Þó gæti hitnað í kolunum þegar fjörið færist í leikinn ...

Sjá nánar í viðhengdri auglýsingu.

Upplýsingar veita
Eyþór Ingi Jónsson 663-1842
Hjörleifur Örn Jónsson 697-5845
Lára Sóley Jóhannsdóttir 867-0749

Með kveðju,
Hymnodia, Eyþór Ingi, Hjörleifur Örn og Lára Sóley

2009-08-19T16:19:00.000-07:00

Strandsigling

Verksmiðjan á Hjalteyri.

Laugardaginn 22 ágúst kl. 20 :00 mun írska kvikmyndagerðarkonan Moira Tierney sýna og fjalla um kvikmyndir sínar í Verksmiðjunni á Hjalteyri.

Moira Tierney stundaði nám í Dublin og París en fluttist að því loknu til New York þar sem hún starfaði með Jonas Mekas við Anthology Film Archives. Hún er stofnfélagi í SOLUS collective fyrir tilraunakvikmyndir sem hefur bækistöðvar sínar í Dublin og er þáttakandi í væntanlegri sýningarferð þeirra um Írland, Egyptaland, Túnis og Mauretaniu á haustdögum 2009.

Kvikmyndir Moiru Tierney eru fyrst og fremst teknar á Super-8mm og 16mm filmur; þær eru mannlýsingar úr þéttbýlinu og viðfangsefnin jafn fjölbreytt sem samfélag Förufólks á Írlandi til Haitískra aðgerðarsinna í New York til Snáka og Magadansara til Franskra sirkusa til Rússneskra sundkappa til veggmynda í Bronx til Max Roach og Cecil Taylor « in the house »…….. í Verksmiðjunni mun Moira segja frá og sýna úrval stuttmynda frá síðustu tíu árum, viðburðinn nefnir hún strandsiglingu.

www.moiratierney.net

www.soluscollective.org

Í Verksmiðjunni á Hjalteyri stendur nú ennþá yfir sýningin Kvörn sem er samsýning stofnenda Verksmiðjunnar. Sýningin er opinn um helgar frá 14:00 til 17:00, einnig er hægt að komast að samkomulagi um að fá að sjá hana utan sýningartíma. Laugardagurinn 22 ágúst er lokadagur sýningarinnar.

K v ö r n

2009-07-24T12:35:00.000-07:00

Jóna Hlíf Halldórsdóttir

Laugardaginn 1. ágúst kl. 15.00 opnar sýningin Kvörn í Verksmiðjunni á Hjalteyri.

Á sýningunni eru verk eftir stofnendur Verksmiðjunnar og einn gest.

Aðalheiður S. Eysteinsdóttir, Arnar Ómarsson, Arna Valsdóttir, A.P.E. , Clémentine Roy,

Gústav Geir Bollason, Hlynur Hallsson, Jón Laxdal, Jóna Hlíf Halldórsdóttir, Knut Eckstein,

Lene Zachariassen, Véronique Legros, Þórarinn Blöndal.

Átök um yfirráðin standa enn……. Á sama tíma og endurmatið á gildum samfélagsins og menningarinnar fer fram í rústum gjaldþrota hlutaveltunnar, bæði andlega og efnislega.

Hlutir sem við sjáum í rými sem geymir þá, geta þeir tilheyrt okkur á okkar stað, ef að einhver annar beinir samtímis athygli sinni að þeim og gerir þannig tilkall til þeirra? Þetta megum við oft reyna – meðvitað/ómeðvitað – við margvíslegar aðstæður, en ekki er gott að átta sig á því af hverju samkeppni ætti að skapast á milli þeirra sem líta sömu hlutina augum. Það ber þó gjarnan við þegar mat á gildi þeirra og merkingu bætist við, sem tekur til þess hæfileika að sundurgreina og fella dóma um gildið. Um gildi hvers sem vera skal og þar með hefst oft ójöfn aðgreining þess sem telst skipta einhverju máli. Það kann að vera einhver lausn á þessari togstreitu þegar við náum að beina augum okkar að raunveruleikanum eins og hann er. Það að takast sameiginlega á við hindranir, ekki eingöngu við að sjá þennan raunveruleika, heldur skynja það sem er handan auðkenndra forsenda hans (þess sem blasir við). Við þurfum því að öðlast einhvern sameiginlegan skilning á því hvernig við hugsum og metum gildi hlutanna. Til þess þarf einhvern einn hvarfpunkt sem leyfir að út frá honum byggist upp sameiginlegt perspektív. Það má jafnframt taka með í reikninginn og minnast þá allra þeirra óbugandi huglægu viðhorfa, tilfinninga, skynjana, hugsana og framsetninga sem hvert okkar, sem af sjálfu sér, veit, hefur og þarf að fást við með eigin dómgreind, og um leið, mati á öllu því sem einhverju kann að varða.

Hvernig er best að finna þennan hvarfpunkt? Hann gæti leitt aftur til grundvallaratriða og orðið upphaf endurmats. Í bókstaflegri merkingu er hugmyndin sú að finna upp hjólið að nýju.

Um þessar mundir er liðið tvö ár síðan hópurinn lagði af stað með fyrirætlanir um blómlegt menningarlíf í gömlu Verksmiðjunni á Hjalteyri.

Ekki verður annað sagt en vel hafi tekist til og listáhugafólk verið duglegt að leggja leið sína á fjölbreitilega viðburði.

Verksmiðjan hefur öðlast nýtt líf í hugum fólks og möguleikarnir óendanlegir.

Sýningin stendur til 22. Ágúst og er opin um helgar frá kl. 14.00 - 17.00.

verksmidjan.blogspot.com

Nánari upplýsingar gefur Hlynur Hallsson í síma 659-4744 eða Gústav Geir Bollason í síma 461-1450

Sjónleikurinn

2009-07-23T11:50:00.000-07:00

Verksmiðjan á Hjalteyri

Ódauðlegt verk um samhengi hlutanna

Eftir Steinunni Knútsdóttur

Áhugaleikhús atvinnumanna

Sunnudaginn 26. júlí 2009 kl. 22:00

www.verksmidjan.blogspot.com

Sunnudaginn 26. júlí flytur Áhugaleikhús atvinnumanna sjónleikinn "Ódauðlegt verk um samhengi hlutanna" eftir Steinunni Knútsdóttur.

Sýningin hefst kl. 22.00 og er verkið um það bil klukkustund í flutningi.
Aðgangur er ókeypis og allir velkomnir.

(Sjónleikurinn) Ódauðlegt verk um samhengi hlutanna
Eftir Steinunni Knútsdóttur
Verkið er hluti af fimmverka röð ódauðlegra leikverka um hegðun og eðli mannsins og er annað í röðinni. Verkin eru rannsókn á áráttuhegðun mannkyns og ófullkomleika. Þau feta sig inn í augnablikið þar sem maðurinn stendur berskjaldaður frammi fyrir guði og viðurkennir vanmátt sinn. Verkin leita að sársaukanum sem býr djúpt inní sálu mannsins og leitast við að skilja hann. Fyrsta verkið í kvintólógíunni var Ódauðlegt verk um stjórn og stjórnleysi og var sýnt við góðan orðstír í Klink og Bank listasamsteypunni vorið 2005 en þriðja verkið er í smíðum og verður frumsýnt í september á LOKAL, alþjóðlegri leiklistahátíð í Reykjavík í september.

Áhugaleikhús atvinnumanna er hópur áhugafólks um frelsi til óháðrar listsköpunar í leiklist. Áhugaleikhús atvinnumanna hefur áhuga á leiklist sem talar til sinna áhorfenda án þess að verða meðvirk. Áhugleikhús atvinnumanna lítur á leiksýningar sínar sem vettvang til að velta áleitnum spurningum fyrir sér þó ekki sé langt í kímni og kæruleysi. Engir peningar renna í gegnum Áhugaleikhús atvinnumanna og er ókeypis er inn á leiksýningar leikhússins.

Höfundur og leikstjóri verksins er Steinunn Knútsdóttir um útlit sér Ilmur Stefánsdóttir en leikarar sýningarinnar eru:

Aðalbjörg Árnadóttir
Árni Pétur Guðjónsson
Hera Eiríksdóttir
Jórunn Sigurðardóttir
Lára Sveinsdóttir
Magnús Guðmundsson
Ólöf Ingólfsdóttir/Steinunn Knútsdóttir
Sveinn Ólafur Gunnarsson

Nánari upplýsingar veitir Steinunn Knútsdóttir í síma 6624805 steinunn_knutsdottir@hotmail.com

http://www.facebook.com/pages/manage/updates.php?id=92671772828&sent=1&e=0#/event.php?eid=105282302373&ref=mf

http://mynd.blog.is/blog/mynd/entry/917724

Menningarráð Eyþings, Norðurorka og Ásprent styrkja Verksmiðjuna á Hjalteyri. Að auki styrkir Slippurinn á Akureyri þessa sýningu.

Myndir frá Gjörningahelginni

2009-07-23T11:47:00.001-07:00

GJÖRNINGAHELGI

2009-07-07T15:47:00.000-07:00

Í kvöld, föstudag 10. júlí kl. 21.00, verða allir gjörningarnir fluttir sem auglýstir hafa verið í Verksmiðjunni á Hjalteyri, Enginn á morgun. Verið velkomin og eigum góða kvöldstund saman.

Á dagskrá eru Joris Rademaker, Helgi Svavar Helgason, Davíð Þór Jónsson, Aðalheiður S. Eysteinsdóttir og Ásdís Sif Gunnarsdóttir.

Gjörningahelgi Verksmiðjan á Hjalteyri.

Föstudag 10. Júlí kl. 21.00
Helgi Svavar Helgason og Davíð þór Jónsson
Framkvæma tónlistarspuna með mynd- og leiklist.

Laugardag 11. Júlí kl. 17.00
Joris Rademaker og fl. fremja görninga.

Yfirstandandi sýning.
Ilmur Stefánsdóttir og Pétur Örn friðriksson

Opið um helgar kl 14.00-17.00

Styrktaraðilar: menningarráði Eyþings, Norðurorka og Ásprent

2009-07-06T15:37:00.000-07:00

Kórsöngur vélanna / húsameistari – könguló

2009-06-30T07:03:00.000-07:00

2009-06-25T08:50:00.000-07:00

Verksmiðjan á Hjalteyri

Kórsöngur vélanna / húsameistari – könguló
Pétur Örn Friðriksson
Ilmur María Stefánsdóttir
27. júní - 19. júlí 2009
Opnun laugardaginn 27. júní kl. 15 - 17
Opið um helgar frá kl. 14 - 17
verksmidjan.blogspot.com

Kórsöngur vélanna / húsameistari - könguló

Á næstunni, munu árvökulir vegfarendur á Hjalteyri geta að nýju heyrt glaðlegan vélargný úr Verksmiðjunni. Hann stafar frá heimilistækjum, steypuhrærivél og óvenjulegum rennibekk. Þau hafa þar afsannað einhliða notagildi sitt og í fagurfræðilegum tilgangi, raskað og sett sig úr samhengi hlutanna með nýjum og óvæntum verkefnum.

Hljóðlátari er köngulóin sem að með aðstoð trésmiðs hefur spunnið sér íverustaði út um allt og inn í skúmaskotin.

Listamennirnir Pétur Örn Friðriksson og Ilmur María Stefánsdóttir eiga það helst sammerkt að fást við gagnslausar tilraunir á mörkum þess nytsamlega og tæknilega. Niðurstaðan birtist oftar en ekki í mjög fullkomnum hlutum.

Við fyrstu sín mætti ætla að sum verka Péturs Arnar gætu átt uppruna sinn að rekja til einhverrar rannsóknarstofu eða séu, stundum, jafnvel nokkurs konar „alþýðleg vísindi“, þegar hann í raun og veru er að skapa líkön sem birta öðru fremur hugmyndir um eðli og eiginleika listaverka
Ilmur María beinir athugunum sínum að gagnverkandi tengslum fólksins og hlutanna. Hún þróar tilbúin, hversdagsleg tæki í eitthvað óvenjulegt, breytir hlutverki þeirra og bætir gagnsemd.
Sýningin opnar laugardaginn 27. júní kl. 15:00 og lýkur 19. júlí. Hún er opin um helgar frá kl.14:00 til 17:00.

Húni II siglir kl. 13:00 frá Torfunefsbryggju á Akureyri á opnun í Verksmiðjunni á Hjalteyri, laugardaginn 27 júní.

Menningarráð Eyþings, Norðurorka og Ásprent styrkja Verksmiðjuna á Hjalteyri.

SHOEBOXTOUR

2009-06-16T08:21:00.000-07:00

Myndataka: Hugi Hlynsson

LJÓÐADAGSKRÁ MEÐ ROKKUÐU ÍVAFI

2009-06-15T05:34:00.000-07:00

Laugardaginn 20. júní verður ljóðadagskrá með rokkuðu ívafi í Verksmiðjunni á Hjalteyri. Umsjónarmaður dagskrárinnar er skáldið og rithöfundurinn Einar Már Guðmundsson en sérlegir gestir hans verða söngvaskáldin Kristján Pétur Sigurðsson og Þórarinn Hjartarson.
Dagskráin hefst kl. 21:00 og er enginn aðgangseyrir og allir velkomnir.

Um þessar mundir stendur yfir sýningin "Hertar sultarólar" í Verksmiðjunni, hún er opin laugardaga og sunnudaga milli kl 14:00-17:00 henni lýkur um næstu helgi og því eru síðustu forvöð að sjá þessa sýningu sem hefur hlotið afar góðar viðtökur og verið vel sótt. Sýningunni lýkur sunnudaginn 21. júní.

Nánari upplýsingar veitir Einar Már í símum 567 6254 og 567 6240

Menningarráð Eyþings styrkir dagskrána í Verksmiðjunni á Hjalteyri

FERÐALAG UM FRAMANDI HEIMA OG LANDÁM

2009-06-10T02:49:00.000-07:00

Ferðalagið um framandi heima og landnám dagsins tókst vonum framar. Þórarinn Blöndal og Gústav Geir Bollason tóku vel á móti hópnum með skemmtilegum verkefnum og Ágúst Ólafsson hjá RUV á Norðurlandi fræddi fjölmiðlafræðinga framtíðarinnar í Alheimi um hvernig gott útvarpsfólk vinnur. Hér eru á ferðinni dugmiklir og skemmtilegir krakkar.

SIRKUSINN SHOEBOXTOUR

2009-06-09T04:18:00.001-07:00

Verksmiðjan á Hjalteyri kynnir sýningarhópinn Shoeboxtour sem samanstendur af heimsþekktum sirkuslistamönnum, þau eru á ferð um landið og sýna ljóðrænan spennandi sirkus. Leikið er undir af raftækjum, unnið með form og ætla þau að spinna af fingrum fram á Hjalteyri. Með þeim í för eru einnig sirkuslistamenn frá Finnlandi sem að ætla að taka þátt í þessum spuna og frá Reykjavík koma tveir alíslenskir töframenn.
Sýningin verður laugardaginn 13. júní og hefst kl. 21:00, enginn aðgangseyrir.

Hertar sultarólar

2009-06-01T11:12:00.000-07:00

Verksmiðjan á Hjalteyri

Hertar sultarólar
30. maí - 21. júní 2009
opið um helgar frá kl. 14 – 17

Sýningarstjóri Aðalheiður S. Eysteinsdóttir
4624981 / 8655091

Arnfinna Björnsdóttir er fædd á Siglufirði 19.07.42. Frá unga aldri hefur hún lagt stund á margskonar handverk og listsköpun sem henni hefur verið hugleikin. Á árunum 1989-92 sótti hún kvöldskóla í myndlist undir leiðsögn Örlygs Kristfinnssonar og í framhaldi af því kom hún sér upp vinnustofu og sýningaraðstöðu að Aðalgötu 13 Siglufirði. Þar hefur hún haldið sýningar á verkum sínum undanfarin 5 ár.
Sýningar utan vinnustofu hafa verið í Kompunni á Akureyri og á Gráa svæðinu í Þelamerkurskóla ásamt samsýningum eins og List án landamæra í ár. Viðfangsefni Arnfinnu eru nú klippimyndir unnar úr tímaritum og dagatölum, mynningar frá síldarárunum á Siglufirði.

Gamli Elgur er fæddur 1969. Hefur hefur oft sýnt allra handa listaverk bæði einn og sér og með öðrum, bæi úti og inni á ýmsum árstímum.
Verkið "Aðstaða- Gálgi til að hengja sig í" er enn ein skrautfjöðrin í hatt listamannsins, sem er pípuhattur.

George Hollanders er sjálfmenntaður leikfangasmiður sem hefur rekið leikfangasmiðjuna Stubb síðan 1994. Hann er mikil áhugamaður um vistvænni hönnun og sjálfbæra þróun og er sífellt leitandi að leiðum til að nálgast samfélagið og umhverfi sitt frá þeim sjónarhóli.
George sýnir ýmsar innsetningar sem hann vann að stórum hluta með sonum sínum Ívari og Viktori Hollanders. Þetta er samansafn af endur- og gjörnýttum munum sem hafa í sköpunarferlinu orðið að einhverskonar ádeilu á neyslusamfélagið sem við búum í. Um er að ræða fullunna endurunna hluti en einnig „concept“ sem ætlað er að vekja til umhugsunar eða vera innblástur um möguleika sem við höfum til að skapa okkar eigin veruleika... Síðan er eitt
verk unnið í samvinnu með Guðrúni Steingrímsdóttur þar sem horn, bein og bíladekkjaslanga ráða för.

Hafdís Ólafsson var ástríðufullur safnari frá Siglufirði. Virðing hennar fyrir húsbúnaði, skrautmunum og nytjahlutum var aðdáunarverð og var heimilið vandlega útbúið þannig að best færi um söfnin. Hafdís setti upp og starfrækti safn á gamla gull og úrsmiðaverkstæðinu á Siglufirði, það eina sinnar tegundar. Í Verksmiðjunni fáum við að sjá safn straujárna sem marka upphaf þess ágæta verkfæris til dagsins í dag.

Hans Pétur Kristjánsson er bifvélavirki og bóndi. Hann mætir með gamalt mótorhjól og heimasmíðuð verkfæri.

Haraldur Ingi Haraldsson nam myndlist við Myndlista- og Handíðaskóla Íslands og í Hollandi. Hann hefur haldið fjölda sýninga.
Codhead / Þorskdóms verkin byrjaði hann að vinna árið 2000. Verkin eru innsetningar, 3 víð veggverk, teikningar og málverk. Á Hjalteyrarsýningunni eru 2 innsetningar.
Þorskurinn skipar veigamikinn sess í sögu íslensku þjóðarinnar. Gríðarlegum auðæfum hefur verið safnað með þorskveiðum og verslun. Þau hafa byggt upp íslenskt samfélag til góðs og ills.
Codhead er speglun orðsins Godhead og Þorsksdómur orðsins Guðdómur. Þar er einhverskonar samfélagskerfi tilvistar, regla og tákna. Önnur vídd til að rannsaka frá þessari.

Henriette van Egten er Hollenskur listamaður sem árlega dvelur í húsi sínu hér á Hjalteyri við listsköpun. Annars er hún búsett í Amsterdam og rekur þar bókverkabúðina Boekie Woekie ásamt Rúnu Þorkelsdóttur og Jan Voss. Myndirnar sem Henriette sýnir í Verksmiðjunni vann hún á Hjalteyri síðasta sumar upp úr umbúðum sem féllu til utan af matvöru.

Íris Ólöf Sigurjónsdóttir textíll - vinnustofa - land - garður - pappír -rafmagnsvírar - tréafklippur - dúkkur - stelpur - dans - himinn - svífur - kjólar.

Jónborg Sigurðardóttir útskrifaðist úr Myndlistarskólanum á Akureyri vorið 1995 úr málunardeild, stundar nú nám í fatahönnun í Danmörku. Ég hef alla æfi verið safnari og ætla alltaf að búa til eitthvað úr því sem flestir myndu henda, fötin sem ég hef breitt á einfaldan hátt fá annan tilgang og hlutverk. T.d. kjóll með útsaumsmynd af Amaliuborg er fínn til að vera í Danmörku og undirkjóll með ásaumaða barbí kjólnum er undirkjóllin fyrir þennan kjól. Svo er gullblússan götótt því sælir eru þeir sem geta klórað sér í gegnum götin. Endurvinnum og hefjum sjálfsþurftar búskap.

Kristinn Rúnar Gunnarsson (Kiddi) er fæddur á Akureyri 1980.
Hann hefur fengist við tónlist frá unglingsárum en fór að prufa sig áfram í myndlist árið 2005. 2006 skipti hann penslinum út fyrir pappír.
Efni í tvívíðu myndirnar er fengið úr Dagskránni og einstaka tímariti, og eru þær unnar á karton úr morgunkornspökkum. Þrívíðu myndirnar (í plastinu) eru unnar úr sígarettupökkum, Dagskránni og einstaka tímariti.
7.og 8. bekkur Þelamerkurskóla Nemendur Aðalheiðar S. Eysteinsdóttur hafa á undanförnum árum fengist við endurhönnun eða endursköpun tilfallandi hluta eins og heimilistækja og leikfanga. Nemendur vinna á eigin forsendum eftir að hafa fengið kynningu á listaverkum þekktra listamanna á borð við Dieter Roth og umfjöllun um kvikmyndina Toy story. Verkin voru unnin nú á vordögum.

Anna Richards er Akureyringur sem hlotið hefur starfslaun og viðurkenningar fyrir list sína. Hún er þekktari fyrir dansgjörninga sína en fatahönnun og saum eins og nú gefur að líta.

Laufey Pálsdóttir er útskrifuð frá Myndlistaskólanum á Akureyri og stundar alla jafna rósamálverk. En hér sýnir hún á sér aðra hlið með endurunnum verkum sem eiga sér sterka tengingu við fjölskyldu hennar.

Erika Lind stundaði nám við Myndlistaskólann á Akureyri og hefur um nokkurt skeið unnið á Listasafninu á Akureyri. Oft hefur það vakið athygli fólks hversu lífleg og falleg heimasaumuð föt Eriku eru sem hún sýnir nú.

PéturK (Pétur Kristjánsson) fæddist í BNA árið 1952 Hann stundaði nám í þjóðfræði við Háskólann í Lundi í Svíþjóð. Hefur búið á Seyðisfirði síðan 1984. Á árunum 1991 til 1998 vann hann að mörgum verkefnum með og fyrir vin sinn og læriföður Dieter Roth. Pétur er forstöðumaður Tækniminjasafns Austurlands. Hann hefur verið prófessor í Dieter Roth Akademíunni frá stofnun hennar árið 2000 og er stjórnarformaður Skaftfells, miðstöðvar myndlistar á Austurlandi.
Verkið “Málað eftir númerum” inniheldur stórvirkar vinnuvélar, m.a. skurðgröfur, dráttarvélar og flutningabílar.

HERTAR SULTARÓLAR

2009-05-28T04:15:00.000-07:00

Verksmiðjan á Hjalteyri loftar út eftir veturinn með sýningunni “Hertar sultarólar” og vill með henni vekja athygli á að eftirtalin kunna að hafa öðlast nýtt líf, stökkbreytt og endurhönnuð til framtíðar:
gálgi - ónýt heimilistæki – listamaður – sígarettur – kjóll – gildi – straujárn - ferskur fiskur – frístundafólk – markaður – blússa - fjársjóður - úrelt dagatöl – langanir - klippimyndir – safnarar – matarumbúðir – dagblöð – pils – hönnuður – myndverk – vél - ruslakista - hráefni og konsept.

Sýningarstjóri “Hertra sultaróla” er Aðalheiður S. Eysteinsdótti og hefur hún fengið 15 listamenn til liðs við sig. Þau eru:
Pétur Kristjánsson
Helgi Þórsson
Georg Hollanders
Henriette van Egten
Anna Richards
Jónborg Sigurðardóttir
Haraldur Ingi Haraldsson
Safn Hafdísar Ólafsson
Kristinn Rúnar Gunnarsson
Erika Lind,
Íris Ólöf Sigurjónsdóttir
Laufey Pálsdóttir
Arnfinna Björnsdóttir
Hans Kristján
Lene Zachariassen
7. og 8. bekkur Þelamerkurskóla undir handleiðslu Aðalheiðar S. Eysteinsdóttur

Sýningaropnun er 30. maí kl.15.00. Sýningin stendur til 21. júní og er eingöngu opin um helgar frá kl. 14.00 til 17.00.
Sýningargestir eru hvattir til að leggja til hliðar ráðandi verðmætamat og njóta líðandi stundar.

Rúta fer frá Torfunesbryggju á opnunina kl:14:45 og fer til baka um 17:00.
Miðaverð er 500 kr.
Aðeins fer ein rúta svo við bendum fólki á að panta sér sæti hjá Þórarni Blöndal "thorarinnb@simnet.is
eða hjá Hlyni Hallsyni "hlynur@gmx.net"

2009-04-28T10:12:00.000-07:00

Laugardaginn 2. maí munu nemendur í Lokaverkefni à Listnámsbraut Verkmenntaskólanns à Akureyri, opna sýninguna "Þrír í þriðja" í Verksmiðjunni á Hjalteyri .
Sýningin opnar kl. 14:00 og verður hún opin aðeins þessa einu helgi, laugardag og sunnudag 3. maí milli 14:00 - 18:00.
Vonumst til að sjá ykkur .

2008-10-03T03:17:00.000-07:00

Staðir ofan í sverðinum
MYNDLIST **** 1/2*
---------
Verksmiðjan á Hjalteyri

SÝNINGIN Grasrót hefur fest sig í sessi hjá Nýlistasafninu síðan fyrstu sýningunni var hrint af stað árið 2000 með það að markmiði að gera skil á því helsta sem yngsta kynslóð myndlistarmanna er að sýsla. Hefur þemað svo gengið gegnum misgóð ár. Við höfum fengið stofnanlega Grasrót, Grasrót fyrir alla grasrót og Grasrót með einum útvöldum fulltrúa.

Sýningarstjóri Grasrótar 2008 er Þórarinn Blöndal og er sýningin unnin í samvinnu Nýlistasafnsins og Sjónlistar. Í ár er því enn nýtt snið á Grasrótinni. Sýningin er nefnilega ekki í Nýlistasafninu. Hún er í yfirgefinni síldarverksmiðju á Hjalteyri.

Um leið og maður gengur inn í sýningarsalinn blasir við súla Jónu Hlífar Halldórsdóttur sem á stendur í þrívíðum hástöfum: "HÉR". Verkið heitir ; "Alls staðar annars staðar", en í viðbót við súluna eru ritaðir textar eða ljóð sem fjalla um staðsetningar og tekst henni þannig, þrátt fyrir að merkja stað með súlu, að gera staðinn margræðan.

Lengra inn eftir salnum hefur Björk Viggósdóttir ráðist í rýmið með því að fylla hluta þess með fjöldaframleiddum regnhlífum. Hún lýsir þær upp þannig að þær ýmist endurvarpa eða hleypa ljósi í gegnum sig. Þessi einfaldi gjörningur umbreytir rýminu en minnir mann um leið á breytta tíma á Íslandi. Í öðru rými sýnir hún seiðandi skjáverk sem vísar út fyrir rýmið. Beinist að glugga og maður situr eins og á stafni eða bakborði skips, horfir út og ruggar sér með.

Framlag Guðmundar Vignis Karlssonar vísar einnig út fyrir rýmið en byggist jafnframt á sögu þess eða tengingu við sjóinn. Í myrku herbergi stendur sjónvarp sem sýnir blóðrauðar öldur, en á vegg beinist ljóskastari á titrandi stálplötu sem endurvarpar merlandi geislum á vegginn á móti á meðan platan drynur líkt og ólgandi ölduhaf. Þetta er hádramtískt listaverk þar sem tekist er á við rýmið með skynsömum og vafningalausum hætti.

Verkið "Irdó" er tilraun Halldórs Ragnarssonar til að búta niður tungumálið, en listamaðurinn tekur gælunafn sitt og ruglar því út og suður. Auk þess sem hann vinnur málverk með texta og rithönd. Lettpönkað og skoplegt og nógu gróf til að höndla hrátt rýmið og vinna með því.

Að öðrum ólöstuðum er verk Jeanette Castioni, "The Law of dialectic", með eindæmum vel heppnað. Hún merkir staði víðsvegar í verksmiðjunni með númerum þar sem maður getur hlustað á eina hlið samtals manna á milli. Hver staður á þannig í samtali við alla hina. Fyrir miðri verksmiðjunni hefur Castioni svo komið fyrir hreyfimynd sem sýnir arkítóníska beinagrind borgar þar sem staðir eru merktir með lituðum punktum svo maður getur ímyndað sér samskonar samtöl þar á milli.

Hvað heildarmynd varðar þá upplifi ég eins og listaverkin öll merktu sér staði inn í rýminu en að sama skapi væru listamennirnir að merkja sér stað í listinni. Þá er tungumálið áberandi hjá listamönnunum sem abstrakt og ljóðrænt fyrirbæri og meðvitund fyrir rýminu öllu þótt hver og einn væri með sinn stað.

Sýningarstaðurinn er líka áskorun út af fyrir sig, hrátt og stórt rými sem rekur listamenn til að hugsa upp á nýtt, eða allavega út fyrir hvíta kubbinn og inn í hráleika veðurbarinnar verksmiðjunnar.

Nota listamennirnir gólfið áberandi mikið þannig að athygli manns dregst frá áreiti rýmisins og máski er það um leið táknrænt fyrir þessa grasrót að hún lætur mann ekki sleikja yfirborðið heldur beinir manni ofan í svörðinn.

Jón B.K. Ransu

GRASRÓT 2008

2008-09-02T06:02:00.000-07:00

Fimm ungir listamenn taka þátt í Grasrót 2008

Sýningin Grasrót 2008 verður þetta árið sett upp í Verksmiðjunni á Hjalteyri. Grasrótarsýningarnar hafa nú þegar unnið sér sess sem sýnishorn af því áhugaverðasta sem ungir og upprennandi listamenn eru að fást við. Hingað til hafa grasrótarsýningarnar verið í Nýlistasafninu að þessu sinni verður breyting þar á. Verkefnið unnið í samvinnu Verksmiðjunnar við Nýlistasafnið og Sjónlist. Sýningin Grasrót 2008 opnar laugardaginn 20. september 2008 en um þá helgi verða Sjónlistarverðlaunin afhent á Akureyri.

Fimm listamenn hafa verið valdir til að taka þátt í Grasrót 2008i og þau eru Björk Viggósdóttir, Guðmundur Vignir Karlsson (Kippi Kaninus), Halldór Ragnarsson, Jeannette Castioni og Jóna Hlíf Halldórsdóttir.

Þau komu öll í Verksmiðjuna á Hjalteyri í síðustu viku til að skoða aðstæður og leggja drög að spennandi verkum sem þau munu setja upp. Þórarinn Blöndal er sýningarstjóri Grasrótar 2008.

Björk Viggósdóttir er fædd 1982 á Akureyri og býr og starfar í Reykjavík. Hún útskrifaðist af myndlistarbraut Listaháskóla Íslands 2006.

Nánari upplýsingar á:

http://bjorkbjork.blogspot.com

http://www.myspace.com/bjorkbjork

Guðmundur Vignir Karlsson (Kippi Kaninus) er fæddur 1978 í Reykjavík og býr og starfar þar. Hann nam myndlist og tónlist við Het Koninklijk Conservatorium í Haag og lauk þaðan námi 2007.

Nánari upplýsingar á:

http://www.kippikaninus.com

Halldór Ragnarsson er fæddur í Reykjavik 1981. Hann býr og starfar í Reykjavík. Hann lærði heimspeki við Háskóla Íslands og nam myndlist við Listaháskóla Íslands og lauk þaðan námi 2007. Hann var gestanemi við Hochschule der Künste í Berlín 2005-2006.

Nánari upplýsingar á:

http://hragnarsson.com

http://www.myspace.com/mariomuskat

Jeannette Castioni er fædd í Verona á Ítalíu 1968 og býr og starfar þar og í Reykjavík. Hún útskrifaðist úr málaradeild listaakademíunnar í Bologna 2002 og frá myndlistardeild Listaháskóla Íslands 2006.

Nánari upplýsingar á:

http://www.hivenet.is/terra/jeannette

Jóna Hlíf Halldórsdóttir er fædd í Reykjavík 1978 en býr og starfar á Akureyri. Hún útskrifaðist af myndlistardeild Myndslistarskólans á Akureyri 2005 og stundaði framhaldsnám í Glasgow School of Art 2005-2007.

Nánari upplýsingar á:

http://www.jonahlif.com

Verksmiðjan: http://www.verksmidjan.blogspot.com

Nýlistasafnið: http://www.nylo.is

Sjónlist: http://www.listasafn.akureyri.is

Nánari upplýsingar veita Þórainn Blöndal 899 6768 og Hlynur Hallsson 659 4744

Björk Viggósdóttir (f.1982) útskrifaðist frá Listaháskóla Íslands árið 2006. Hún hefur tekið þátt í sýningum á vegum gallerý i8 , í Klink og Bank, Safni, Kirkjuhvoli, Bank Academy í Frankfurt, Kling og Bang, Dionysia project í samvinnu við Nýhil, tvem sýningum í Listasafni Einars Jónssonar og Sequenses. Hún hefur gert heimildarmynd fyrir Reykjarvíkurborg um Götuleikhúsið og hljóðverk. Gefið út geisladisk frá Smekkleysu með hljómsveitinni Lúna. Björk gerði 12 video verk fyrir leikritið „Bakkynjur" í Þjóðleikhúsinu. Hún hefur unnið með nútíma klassískum tónskáldum,frá Ítalíu, íslandi og bandaríkjunum.

Björk Viggósdóttir var einn af Dungal verðlaunahöfum 2008.

Hún var ein af sex myndlistarmönnum til að hljóta dvöl í Millay Colony for the arts í New York 2008 og hún dvaldi í 1 international open art residency í júní 2008 í Grikklandi.

Næstu sýningar verða grasrót, Sequenses, Monkey Town, Chelsea Museum og Listahátíð 2009.

http://bjorkbjork.blogspot.com/

Guðmundur Vignir Karlsson er fæddur í Reykjavík 1978 og bjó fyrstu árin í Hafnarfirði. Því næst tók við útlegð í Menntaskólanum á Laugarvatni þar sem hann kynntist tónlist, kórsöng og ýmsu sem fylgt hefur alla tíð síðan. Guðfræðideild Háskóla Íslands var heimsótt og þaðan lokið BA gráðu. Síðastliðin 8 ár hefur GVK kallað sig Kippi Kaninus og þá fengist við tilraunakennda raftónlist, gefið út fjórar plötur og spilað einn og með öðrum, utan og heima. Sem tilraun til að sameina áhugann á sjónlistum og tónlist, skráði hann sig í Image and Sound nám í Konservatoríinu í Haag í Hollandi og lauk þaðan MA gráðu árið 2007. Vekin sín hefur hann sýnt aðallega í Hollandi en einnig á tvíæringi í Carrara á ítalíu, Kirkjulistahátíð í Reykjavík og Listasafni Árnesinga, einnig tekur hann þátt í Sequences hátíðinni í Reykjavík í október.

Halldór Ragnarsson sýnir verkið Irdó í Verksmiðjunni á Hjalteyri. Verkið samanstendur af teikningum, málverkum og textum Halldórs og er beint framhald af vinnu hans með orðum, sem hefur skipað stóran sess í myndlist hans undanfarin tvö ár.

Halldór Ragnarsson er fæddur í Reykjavík 1981 og stundaði hann nám í heimspeki við Háskóla Íslands áður en hann fór í myndlist í Listaháskóla Íslands þar sem hann útskrifaðist vorið 2007. Hann hefur haldið einkasýningar, bæði hér heima og erlendis, ásamt því að hafa tekið þátt í nokkrum samsýningum. Halldór var meðlimur og einn af stofnendum hljómsveitarinnar Kimono (2001-2007) sem gaf út þrjár plötur hjá Smekkleysu en í dag er hann meðlimur í hljómsveitinni Seabear sem er gefin út af þýska útgáfufyrirtækinu MORR music. Einnig gaf Halldór út ljóðabókina Öreindir af lúsinni vorið 2004.

Jeannette Castioni, ég útskrifaðist frá LHÍ árið 2006, áður stundaði ég nám við Akademíuna í Bologna, og einnig nám í forvörslu í Flórens. Í byrjun 2008 ákvað ég að skrá míg í Ma.Phil. í listasögu við Háskólann í Verona á Ítalíu. Í aukna- blikinu er ég að kenna málunartækni sem stundakennari við LHÍ.
Frá árinu 1999 hef ég haldið sýningar á Ítalíu, í Verona og Turin og frá 2004 hér á Íslandi, Bandaríkjunum, Þýskalandi og Rússland. Ásamt tímabundnum innsetningum hef ég unnið með ljósmyndarannsóknir og video viðtöl um ástand unglinga í Nuuk, Grænlandi þar sem ég dvaldi og hélt vinnustofu. Ásamt skólanum í Nuuk var ég að vinna með Silamiut leikhúsinu þar sem tekið upp var ferli við leiksmiðju með Makka Kleist, aðal leikara og stjórnanda leikhússins. Heimildarmynd um listsköpunarferli í meðferðarheimili fyrir „outsiders“ einstaklinga á Ítaliu er annað verkefni sem ég tók að mér, fyrir tveimur árum, með tilvitnun í listakonuna sem sér um deildinna Piera Legnaghi, ásamt ferli hennar.
Tæknin sem ég nota eru oft blönduð og innihaldið tengist hugsuninni og skilaboðunum sem eru gefin í hvert skipti, frá ljósmyndum, innsetningum, lífrænum efnum og líðandi tíma.

Jóna Hlíf Halldórsdóttir(1978) er fædd í Reykjavík en býr og starfar á Akureyri. Hún útskrifaðist með Diploma frá Myndlistarskólanum á Akureyri árið 2005 og með Mastersgráðu í myndlist frá Glasgow School of Art árið 2007.

Jóna Hlíf vinnur með ýmsa miðla, s.s. vídeó, skúlptúr, bókverk og ljósmyndir. Stór hluti verka hennar eru svo textaverk, sem eru oftar en ekki nokkuð djarfar yfirlýsingar, setningar sem lýsa tómhyggju og eru einskonar stuðandi lógó, orð sem stinga. Þessar setningar virðast auðmeltar við fyrstu sýn en leita svo á mann, etv. líkt og auglýsinga-lógó, sem hreiðra um sig í undirmeðvitund okkar.

Verk Jónu Hlífar eru persónuleg úrvinnsla hennar á upplifunum úr daglega lífinu, sem hún útfærir gjarnan í formi myndmáls sem tengist götulist. Verkin eru gjarnan óræð og hafa yfir sér hráan blæ, sum unnin úr fjöldaframleiddum efnum, önnur handgerð af listamanninum. Það sem sameinar þau er tenging við mannslíkamann og sálina, sem talið er að hvíli þar í einhverju hólfi sem sést þó ekki á röntgenmynd. Sum verka Jónu Hlífar eru performans-verk í formi vídeó eða ljósmynda, önnur eru textaverk sem visa í viðbrögð og breytingar mannslíkamans og í enn öðrum verkum er áhorfandanum boðið að taka þátt í verkinu með því að ganga inn í strúktúra, sem kalla á upplifun á tengslum sálar og líkama; sem vekja hugsanlega upp spurningar um hvað okkur skortir, hvar í líkamanum við staðsetjum þann skort og hvaða aðferðum við beitum til að fylla upp í tómið.

Verk Jónu Hlífar Halldórsdóttur hafa verið sýnd nokkuð víða: Listasal Mosfellsbæjar (2008), 101 Gallery í Reykjavík (2008), Listasafnið á Akureyrar (2007), Kunstraum/Wohnraum á Akureyri (2006), Kunstvlaai í Amsterdam (2006), Tramway, Glasgow (2007, útskriftarsýning) og A Cabine do Amador í Lissabon. Framundan eru sýningar Jónu Hlífar í D-sal Listasafns Reykjavíkur, Hafnarhúsi, Gallerie de Aanschouw, Rotterdam og LES Gallery, Vancouver.

Auk starfa sinna sem myndlistarmaður stýrir Jóna Hlíf sýningum á VeggVerki og í Gallerí Ráðhús á Akureyri, auk fleiri myndlistartengdra starfa.

Nánari upplýsingar um Jónu Hlíf Halldórsdóttur:

www.jonahlif.com

START

2008-08-12T17:10:00.000-07:00

Í stærri borgum er ekki óvanalegt að rölta inn í verksmiðjuhúsnæði sem tekið hefur verið yfir til listrænna nota. Myndlistarmenn eru stétt í eilífri húsnæðisleit. Bæði leita þeir sífellt að ódýrum vinnustofum, en einnig að skapandi sýningarrými. Á undanförnum áratugum hefur sýningarrýmið orðið æ stærri hluti af sýningum og listaverkum, sem taka mið af því bæði sjónrænt og huglægt, og oftar en ekki verður rýmið sjálft beinlínis innblástur listaverka. Hin eilífa húsnæðisleit er því ekki neikvæð og vegna skorts, heldur jákvæð og skapandi. Einn slíkur möguleiki opnaðist á Hjalteyri í sumar, fyrir tilstilli listamanna með augun opin. Þar hefur verið opnuð menningarmiðstöð undir nafninu Verksmiðjan, rétt eins og fræg listasmiðja Andy Warhol í New York á síðari hluta 20. aldar. Það er gamla síldarverksmiðjan á Hjalteyri, eitt sinn sú stærsta sinnar tegundar í Evrópu, sem fengið hefur nýtt hlutverk. Feikistórt verksmiðjuhúsið býður upp á mikla möguleika, hvort sem um er að ræða myndlistarsýningar eða aðrar uppákomur en hér hafa verið tónleikar, listasmiðja og væntanleg er ljóðadagskrá. Níu listamenn í Arnarneshreppi sem standa að þessu framtaki, auk nokkurra sem búsettir eru annaðhvort inni á Akureyri eða erlendis. Markmiðið er að skapa umhverfi og aðstöðu fyrir menningarviðburði í hreppnum, aðstöðu á staðnum sem um leið opnar dyr að umheiminum.

Listin tekur við af síldinni

Yfirstandandi sýning var opnuð í byrjun ágúst og listamennirnir sem sýna eru bæði innlendir og erlendir og tilheyra þremur kynslóðum. Kristján Guðmundsson sýnir teikningu og eldra verk, olíumálverk sem fæstir myndu tengja verkum hans í dag. Bæði verkin öðlast nýja vídd í þessu umhverfi. Magnús Pálsson sýnir teikningar frá árinu 1965, forvitnilegar og lífrænar sem sýna einhvers konar samspil líkama og vélar, óbeint má ímynda sér það margbreytilega samspil líkama og véla sem verksmiðjan hefur hýst á sínum tíma. Listakonan og teiknarinn Sigga Björg Sigurðardóttir sýnir teikningar og myndband við tónlist, innsetning sem verður hrárri í þessu umhverfi. Í dimmum sal innst í verksmiðjusalnum má sjá kvikmynd Nicolas Moulin þar sem saman koma maður, náttúra og byggingarlist á gotnesk-súrrealískan máta. Arna Valsdóttir fangar andrúmsloft verksmiðjunnar og liðins tíma í myndbandi sínu sem undirstrikað er með söng og tekið upp í húsnæðinu sjálfu. Staðsett í rýminu miðju verður það eins og hjarta sýningarinnar sem slær í takt við umhverfið. Þá er ónefnt framlag síbreytilegs samvinnuverks undir nafninu Boekie Woekie, myndverkabókabúð í Amsterdam sem birtist einnig í innsetningum sem þessum þar sem sýnd eru myndverk í bókaformi eftir m.a. Jan Voss. Utan dyra er síðan að finna listaverk eftir Alexander Steig, á blámáluðum dyrum er að finna skilti með nafninu Verksmiðjan og út um dyrnar berst stöðugur dynur danstónlistar, rétt eins og þarna sé að finna næturklúbb.

Framhald verður á sýningarhaldi í Verksmiðjunni í september þegar Grasrótarsýningin árlega með verkum ungra listamanna sem hingað til hefur verið í Nýlistasafninu verður opnuð á sama tíma og Sjónlistaverðlaunin verða afhent á Listasafni Akureyrar. Ekki er víst um frekara framhald í vetur þar sem húsnæðið er óupphitað, en vænta má öflugs starfs næsta sumar. Verksmiðjan er flott og vel heppnað framtak, þar sem vel kemur fram hvernig skapa má ný tækifæri á óvæntan hátt ef augun eru opin. Ef til vill er þetta lýsandi dæmi um breytingar í samfélaginu og aukið vægi menningar í atvinnu- og nýsköpun.

Ragna Sigurðardóttir

Opnuninn

Arna Vals

Nicolas Moulins

Sigga Björg Sigurðardóttir

Magnús Pálsson

Kristján Guðmundsson

Boeki Woekie

Kammerkórinn Hymnodia:

Undirbúningur:

Samantekt af listasmiðjunni Landnemar nýtt samfélag.

2008-08-11T12:55:00.000-07:00

Síðastliðinn sunnudagsmorgun þegar klukkan var rétt að verða 10.00 renndi ég niður að Verksmiðjunni á Hjalteyri. Það virtist ætla að viðra vel til útivinnu með unga fólkinu sem skráði sig í listasmiðjuna hjá okkur.

Þær voru mættar með mæðrum sínum, Fríða Björk, Kolfinna og Kristín Eva vinkona hennar. Skömmu síðar kom Rósa Júlíusdóttir lektor í myndlistakennslu og tyllti sér á stein í fjörukantinum. Hún fékk að vera áhorfandi og ransóknaraðili að þessu samstarfi.

Sveinn kom röltandi með föður sínum og Kristján Máni var tilbúinn í slaginn. Gústav Bollason, Odda Júlía, Brák og Ugla renna uppað Verksmiðjunni og síðast en ekki síst Þórarinn Blöndal, Marsibil og Unnar.

Við hófum leikinn norðan við tankana við vatnsbakkan. Þátttakendur settust niður við einn tankinn og ég kynnti hugmyndina um landnámið og nýja samfélagið sem við gætum stofnað. Undirtektir góðar, Kristján taldi að við þyrftum fyrst og fremst að búa okkur til skjól, eitthvað að borða og að helga okkur land. Kolfinna greip hugmyndina um mat og veltir fyrir sér möguleikunum. Kríur voru þar efstar í huga síðan hundasúrur og krækiber í eftirrétt.

Fljótlega kom upp hugmyndin um fleka á vatnið sem kjæmi sér vel við veiði og til skemmtunar.

Við töluðum um að líklega þyrftum við einnig að gera eitthvað fyrir andann, eins og myndskreytingar. Brák datt í hug að gosbrunnur yrði tilvalinn en við gátum ekki gert hann.

Allir voru sammála um að hlaða upp eldstæði og Kristján bennti á að líklega væri gott að mynda ríkisstjórn.

Til að framkvæma allar þessar hugmyndir var ljóst að við þyrftum ýmsan efnivið. Lögðum við því af stað í vettvangs og efniskönnunarleiðangur með Gústav í broddi fylkingar. Fljótlega kom í ljós að vestan við Verksmiðjuna var allt sem við þurftum. Spýtur, strigi, netahringir, sperrur og ýmislegt dót sem hent hafði verið út við uppsetningu sýningarinnar START í Verksmiðjunni.

Það kom eiginlega að sjálfum sér að við skiptumst í hópa. Þegar hér var komið við sögu höfðu þrír listamenn bæst í hópinn, Nicolas Moulin, Clémentine Roy og Véronique Legros. Þórarinn hófst handa við húsasmíðina ásamt Unnari. Þeir reistu hjallasperrur eins og Indjánatjald og bundu saman með snæri. Nicolas og Gústav fóru að huga að flekanum og Véronique, Clémentine og Kolfinna hjálpuðu til við að draga að hráefni í flekann. Brák og Fríða einbeittu sér að húsgagnasmíðinni. Þær fundu stóra og þykka spítu sem hægt var að setja lappir undir. Síðar bættu þær auka horni á bekkinn svo hann varð þriggja til fjagra manna. Kristján smíðaði einnig góðan stól með aðstoð Uglu og Oddu Júlíu að mig minnir. Þriðji stóllinn var svo samvinna nokkurra aðila. Kolfinna og Kristín Eva smíðuðu stórt og fallegt borð sem staðsett var utanvið húsið.

Sveinn fór í að útbúa eldstæði í fjörunni sunnan við Verksmiðjuna. Hann safnaði saman stórum steinum og raðaði þeim í hringi sem pössuðu undir grillgrindur sem ég kom með. Þetta leit út eins og fornleifauppgröftur eða verk eftir Ritchard Long. Marsibil og Odda Júlía hnoðuðu deig í brauð til að hafa með pilsunum og hamborgurunum í hádeginu. Þær kunnu vel handtökin og úr varð fínasta brauð á grillinu.

Nú var Unnar kominn í flekasmíðina með Nicolas og Gústav, Véronique og Clémentine að klæða tjaldið með striga og ég að hjálpa stúlkunum í húsgagnasmíðinni. Þórarinn og Marsibil gerðu síðan útskot á tjaldið sem líktist orðið höll frekar en tjaldi.

Um hádegisbil var samfélagið okkar farið að taka á sig mynd. Véronique hafði komið með málningu og auðvitað tók listrænt eðli krakkana völdin. Þau máluðu mynstur á sperrurnar og laufin á Baldursbránum sem stungið var í strigann innan í tjaldinu til skrauts. Bekkirnir voru einnig fagurlega málaðir og Odda Júlía málaði landslagsmynd sem hún hengdi upp inni. Odda og Kolfinna útbjuggu einnig fagurt Baldursbráabeð í sparslbakka. Marsibil fann frábæra súlu sem minnti á Indjánasúlu og málaði mynstur og tákn á hana. Súlan var látin standa við dyrnar inn í tjaldið.

Það var komið að hádegisverði. Gústav, Sveinn, Fríða, Brák og ég höfðum kveikt upp í grillinu með kolum og spýtnarusli. Hópurinn safnaðist nú saman við eldstæðið og hjálpaðist að við að grilla matinn og útbúa litla brauðhleifa úr deiginu. Allir höfðu góða matarlist og sólin sem hafði verið að fela sig á bakvið ský síðasta klukkutímann skein á okkur sunnan undir vegg.

Eftirrétturinn, sykurpúðar og eplabátar voru gómsætir.

Aftur hafist handa um kl. 13.30, það var aðeins farið að kólna svo að nokkrir strigatískukjólar voru sniðnir. Arna Valsdóttir kíkti við í búðunum okkar og hófst þá tónlistarspuni. Við höfðum safnað saman ýmsu sem hægt var að framkalla hljóð með eins og grjótum, spýtum, netahringjum, tunnum og hömrum. Þegar því lauk var ráðstefna inni í tjaldinu um nafn á þjóðflokknum. Rósa Júll tók þátt í rökræðum og tillögum þátttakenda sem komust að samkomulagi um að heita Ljóshöfðar. Á tímabili lá við að flokkurinn klofnaði vegna nafngiftarinnar. Sólin kom mikið við sögu þar sem Kolfinna var búin að útbúa sólarhljóðfæri og söng sólarsönginn rétt við tjalddyrnar. Ég og Marsibil stigum þar einnig sólardansinn.

Kristján mótmælti þessu væmna sólartali en var borinn yfirliði með Ljóshöfða nafnið.

Okkur þótti líklegt að ljós visku og hugmynda skini frá höfðum þessa ættflokks.

Eftir mikla vinnu og heilabrot var flekinn tilbúinn og bara eftir að koma honum niður að vatninu sem var 50 metra frá tjaldbúðunum. Gústav ákvað að binda hann aftan í bílinn sinn og draga að vatninu. Þetta gekk ágætlega og Ljóshöfðarnir ýttu á eftir flekanum.

Með sameiginlegu átaki komum við flekanum á flot og stoltið skein úr augum hvers manns. Odda Júlía og Ugla fundu langa og mjóa spítu sem hægt var að nota sem stjaka á flekanum. Gústav náði í árar og ég náði í björgunarvesti svo að okkur var ekkert að vanbúnaði að leggja í siglinguna.

Flekinn sem var heljar stór búinn til úr sperrum og bláum plasttunnum bar fimm manns. Farnar voru tvær ferðir með hugrakka Ljóshöfða. Stóri bróðir Fríðu slóst í hópinn og hjálpaði Gústav og Unnari að draga flekann á þann stað sem heppilegur var til að leggja frá landi. Hafgolan sá síðan um að koma flekanum yfir á suðurbakka vatnsinns.

Eftir góðan dag þegar klukkan var orðin 15.30, kvöddust þátttakendur listasmiðjunnar Landnám nýtt samfélag.

Við þökkum þeim kærlega fyrir samveruna.

Aðalheiður S. Eysteinsdóttir.

2008-07-29T03:10:00.000-07:00

Verksmiðjan
Menningarmiðstöð á Hjalteyri

Neðst á Hjalteyri // 601 Akureyri // verksmidjan.blogspot.com // 461 1450 // 865 5091

START

02.08. – 23.08.2008

Alexander Steig, Þýskalandi
Arna Valsdóttir, Íslandi
Boekie Woekie, Hollandi
Kristján Guðmundsson, Íslandi
Magnús Pálsson, Íslandi/Bretlandi
Nicolas Moulins, Frakklandi/Þýskalandi
Sigga Björg Sigurðardóttir, Íslandi/Skotlandi

Opið fimmtudaga til sunnudaga klukkan 14:00 - 17:00

Nánari upplýsingar á http://www.verksmidjan.blogspot.com

---
Myndlistarsýningin START opnar í Verksmiðjunni á Hjalteyri, laugardaginn 2. ágúst 2008 klukkan 14:00.
Sýningin stendur til 23. ágúst.
Opið frá fimmtudegi til sunnudags klukkan 14:00 - 17:00

Dagsskrá:

Laugardagurinn 2. ágúst
14:00 Opnun. Þátttakendur eru Sigga Björg Sigurðardóttir, Kristján Guðmundsson, Magnús Pálsson, Alexander Steig, Boekie Woekie, Nicolas Moulin og Arna Valsdóttir.

15:00 Arna Valsdóttir, Sönggjörningur
17:00 Arna Valsdóttir, Sönggjörningur
18:00 Ghazi Barakat, tónlistaratriði

Sunnudagurinn 3. ágúst
14:00 - 17:00 Listasmiðja
fyrir börn og foreldra. Opið öllum.

Laugardagurinn 9. ágúst
10:00 - 15:00 Listasmiðja fyrir börn
15:00 Arna Valsdóttir, Sönggjörningur
18:00 Kammerkórinn Hymnodia

Sunnudagurinn 10. ágúst
10:00 - 15:00 Listasmiðja fyrir börn
Listasmiðjurnar eru fyrir 10 til 14 ára krakka, ekkert þátttökugjald.
Umsjónarmenn: Aðalheiður S. Eysteinsdóttir, Gústav Geir Bollason og Þórarinn Blöndal.
Skráning hjá Aðalheiði í síma 865 5091

Sunnudagurinn 17. ágúst
15:00 Ljóðadagskrá
í umsjón Jóns Laxdal

Sýningin stendur til 23. ágúst.

Stuðningsaðilar eru Menningarráð Eyþings, Impra, Nýsköpunarmiðstöð, Þýska sendiráðið og BYKO.

Nýtt upphaf í Verksmiðjunni á Hjalteyri

Fyrsta sýningin í gömlu verksmiðjunni á Hjalteyri er samansett af ólíkum myndlistarmönnum af þremur kynslóðum sem vinna í sex löndum. Þau vinna með innsteningar, kvikmyndir, myndbönd, hljóð, málverk, teikningar og gjörninga, svo eitthvað sé nefnt. Verksmiðjan sjálf er spennandi útgangspunktur og umgjörð fyrir verkin sem sum eru gerð sérstaklaga fyrir þessar aðstæður en önnur fá nýja merkingu í þessu hráa umhverfi.

Menningarhátíð á Hjalteyri í ágústmánuði

Von okkar listamannanna sem standa að Verksmiðjunni að Hjalteyrarverksmiðjan og umhverfi hennar verði framtíðarstaður listamanna og þá væri sérstaða hennar í listheiminum veruleg. Hún yrði nokkurs konar frumbýli - listin nemur land - og brúaði með því bil á milli þéttbýlis og landsbyggðar en einnig landsbyggðar og umheims. Hún yrði hvortveggja í senn; svæðisbundin og næði jafnframt til stærri heildar, þar sem hún myndi bæði taka mið af þörfum og áhuga íbúa næsta nágrennis en um leið opna gáttir til umheimsins fyrir tengsl sín og samstarf við erlenda aðila. Umhverfið og húsakynni Hjalteyrar-verksmiðjunnar vekur athygli, hefur áhrif á sköpun og mótar starfsemina. Unnið hefur verið að grunnendurbótum á Verksmiðjunni en tekið tillit til umhverfisins og þess hvernig húsakynni eru í raun. Samspil náttúruafla og mannvirkja hefur verið haft í huga og að leiðarljósi. Verksmiðjan er eitt listaverk út af fyrir sig.

Listasmiðja barna og foreldra 3. ágúst 2008

Í þessari listasmiðju er lögð áhersla á að kenna þátttakendum að lesa umhverfi sitt og nýta til listsköpunar. Hjalteyrin er kjörlendi uppgötvana og ævintýra, sem þegar grannt er skoðað getur verið frábær útgangspunktur sköpunarferlis. Öll þekkjum við fjársjóðsleitina í fjörum landsins og í yfirgefnum verksmiðjum en í þessari smiðju fá börn og foreldrar innsýn í heim listarinnar með eigin uppgötvanir að leiðarljósi.

Listasmiðja barna 9. og 10. ágúst 2008

Hér er um að ræða þrjár smiðjur með leiðsögn þriggja ólíkra listamanna.

Áhersla er lögð á að vinna með fjölbreytt efni og með ólíkum aðferðum. Þannig geta þátttakendur valið sér miðil eftir áhugasviði og getu í samráði við leiðbeinendur.

Þema smiðjunnar er framtíð, fegurð, samvinna. Hóparnir vinna með þessi þrjú hugtök í sitt hvoru lagi og koma svo saman í lok listasmiðjunnar sem eitt verk.

Um Hjalteyri af síðunni www.nat.is

Hjalteyri er smábyggðarkjarni norðan Akureyrar á Galmaströnd, þar sem var mikið athafnalíf á fyrri hluta 20. aldar. Litla höfnin á sandeyrinni er skjólgóð og veitingahús hóf rekstur sumarið 2003. Norðmenn hófu þarna síldarsöltun upp úr 1880 og þorpið varð löggiltur verzlunarstaður 1897. Svíar hófu þarna útgerð 1905 og Skotar næsta ár samtímis Þjóðverjum, sem gerðu mest út 10 skip til þorsk- og síldveiða. Síldin var stundum veidd í landnætur frá sjávarkambinum vegna þess, hve aðdýpi er mikið. Þarna fengu margir atvinnu á þessum gósenárum en árið 1914 hurfu allir útlendingar á brott og þá hafði einnig verið þrengt að möguleikum þeirra til fiskveiða hér við land.

Kveldúlfur hf., fyrirtæki Thors Jensens, tók Hjalteyri á leigu 1913. Thor ætlaði að reisa íshús og nota ís af tjörninni til að geta flutt út ferska síld til niðursuðu í Hamborg, en stríðið kom í veg fyrir það. Kveldúlfur hf. keypti Hjalteyri og jarðir upp til fjalls til að hafa nægilegt athafnarými og aðgang að góðu vatnsbóli. Þrátt fyrir góðan afla og mikla framleiðslu, átti fyrirtækið erfitt uppdráttar á kreppuárunum. Árið 1937 byggði það stærstu síldarverksmiðju í Evrópu á Hjalteyri. Hún var starfrækt til 1966. Á hinum undraskamma byggingartíma hennar voru frosthörkur miklar og þá var hitaður sjór til að blanda í steypuna, sem var hrærð í vélknúinni hrærivél.

Fyrirtækið lét einnig reisa nokkur glæsileg íbúðarhús. Framkvæmdastjórinn, Richard Thors og síðar sonur hans, Thor R. Thors, bjuggu í 500 m² húsi með bílskúr fyrir 4 bíla og aðstöðu fyrir þjónustufólk. Það er nyrzt af húsunum á brekkubrúninni. Annað glæsihús er Ásgarður, þar sem verksmiðjustjórinn, Pétur Jónsson, bjó í 17 herbergjum Það stendur stakt fremst á brekkunni. Þrátt fyrir mikinn mun milli hinna ríku verksmiðjueigenda og almennings, voru þeir velliðnir og hjálpuðu mörgum í neyð án þess að krefjast greiðslu fyrir.

Hvarf síldarinnar á sjöunda áratugnum olli því að síðast var brætt í verksmiðjunum 1966 og atvinnulífið breyttist eins og annars staðar í fiskiplássum á Norðurlandi. Kveldúlfur h.f. pakkaði saman og útgerð smábáta jókst. Aflaföng voru góð og höfnin var bætt með sjóvarnargarði í kringum 1980. K. Jónsson og Co. hóf niðursuðu um 1970 og geymdi hrogn og síld á Hjalteyri. Síldarbresturinn hafði því ekki eins mikil áhrif á atvinnulíf Hjalteyringa eins og víðast annars staðar.

KEA hóf fiskverkun á Hjalteyri í kringum 1980. B.G.B.-Snæfell hf. hóf síðar þurrkun fiskhausa til útflutnings (u.þ.b. 2000 tonn á ári og 200 tonn af skreið). Fiskeldi Eyjafjarðar hóf tilraunastarfsemi með lúðueldi 1985 (síðar Fiskey ehf.). Lúðuhrognin eru flutt frá Dalvík til klaks á Hjalteyri. Mestur hluti seiðanna er fluttur úr landi eftir að þau eru orðin 5 gr að þyngd en 10-20% þeirra eru send til áframeldis í Þorlákshöfn og síðar slátrunar. Árangurinn í lúðueldinu hérlendis hefur vakið heimsathygli og árið 2002 framleiddi Hjalteyrarstöðin 450.000 seiði.

Íbúafjöldinn árið 1950 var 130 manns. Fólki fækkaði síðan verulega en nú (2003) búa 60-70 manns á staðnum. Nokkur gömlu hosanna hafa verið lagfærð, ný byggð og sum hinna gömlu eru notuð sem sumarbústaðir. Árið 2002 var borað eftir heitu vatni á Hjalteyri með mun betri árangri en nokkurn óraði fyrir. Akureyri á eftir njóta góðs af því og þegar var hafizt handa við að leiða það í húsin á Hjalteyri. Kaffi Lísa, sem er í byggingu (2003), var fyrsta húsið, sem var tengt. Eigendur veitingahússins hyggjast bjóða gestum sjóstangaveiði (simi: 821 5920).

Endursögð og stytt grein í Félagsblaði FL apríl 2003.

Heimildir:

Thor Jensen. Framkvæmdaár. Minningar II. Bókfellsútgáfan hf. Reykjavík 1955.

Agnar Þórðarson. Hjalteyri. Munnleg heimild.

Eiríkur Jensen, Akranesi. Munnleg heimild.

Friðrik Magnússon, Hálsi, Svarfaðardal. Munnleg heimild.

Jón Þór Benediktsson.

BOEKIE WOEKIE

2008-07-12T04:41:00.001-07:00

Boekie Woekie er bókabúð í Amsterdam sem hefur verið starfrækt síðan 1986 og leggur aðaláherslu á bækur sem myndverk.Stofnendur hennar allt starfandi myndlistarmenn, eru: Henrietta van Egten, Pétur Magnússon,Kees Visser, Jan Voss, Saskia de Vriendt og undirrituð. Öll höfðum við gefið út bækur í litlumupplögum, Jan átti Rótaprentvél í kjallaranum hjá sé, svo við hófum framleiðslu á fullu. Fyrstu árin urðu þó nokkrar breytingar. Fólk hvarf til annarra verkefna og jafnvel til annarra landa. Síðustu tíu árin hefur Boekie Woekie verið rekið af Henriettu van Egten, Jan Voss og undirritaðri. Boekie Woekie er kannski engin bókabúð í venjulegum skilningi. Við aðstandendur hennar lítumá bókabúðina sem meginverk í listsköpun okkar. Þetta er okkar skúlptúr sem við höfum ferðastmeð og endurskapað í nýju umhverfi vítt og breytt um Evrópu. Hún er listaverk út af fyrir sig, verk þeirra sem eiga hana. Það sem Boekie Woekie sýnir núna í verksmiðjunni á Hjalteyri eru bækur ásamt prentplötunum, en þar byrjar hið eiginlega ferli. Hver litur er teiknaður beint á pappírsplötuna án nokkurra tæknilegrahjálpartækja og köllum við þetta því originalgrafík, þar sem unnið er beint í prentvélina á ljósaborði. Verkið hefur því þá sérstöðu að verða sjálfstætt verk en ekki margfeldi af einhverju sem fyrir er. Er hér því hægt að sjá hvernig okkar bækur verða til, frá teikniborðinu og þar til hún er innbundin.

2008-06-30T01:33:00.000-07:00

ARNA VALSDÓTTIR

NICOLAS MOULIN

Warmdewar er kvikmynd, upphaflega unnin sem vídeó en þar næst færð yfir á 16mm filmu. Myndin sem tekin var á Íslandi árið 2006 í félagi við þýska leikarann og tónlistarmanninn Ghazi Barakat, er 20min. « fiction » án tals sem sýnir manneskju reika um í manngerðri auðn og landslagi í vonlausri leit að lífsmarki. Tökur fór fram við Eyjafjörðinn, í gömlu verksmiðjuhúsunum á Hjalteyri sem og í fjörunni á Ólafsfyrði. Tæknibrögðin eru hlutar arkitektúrs – þeir eiga meðal annars rætur sínar að rekja til ónýtrar hótelbyggingar í Norður Kóreu og steypustykkja úr fyrrum málmbræðslu í St Nazaire (Frakklandi)- sem hefur verið bætt við eða ,skeytt, inn í það sem fyrir er og umhverfa þannig landslaginu í yfirgefna « eyju » leyndardóma úr framtíð. Þetta verk, framkvæmt fyrst og fremst með það í huga að búa til kvikmynda « object » fremur en bíómynd í hefðbundnum skilningi, hefur öllu athyglisverðari návist sem innsetning í rými en varpað upp á tjald í bíósal. Þannig hefur það sýnar vísanir í kvikmyndasöguna, þær myndir sem við alla jafnan nefnum « B » en líka þá gerð sem við kennum við « tilraunir ». Þau áform að sýna það í verksmiðjuhúsinu á Hjalteyri, staðnum þar sem það varð first til og er hin upphaflega kveikja þess kunna að verða forvitnileg í þeirri hringiðu mynda eða kviksjá sem það er. Aukinheldur munum við geta reitt okkur á að leikarinn verður á staðnum og gestir úr næsta nágrenni munu í upplifuninni geta reynt að þekkja aftur þætti úr hinu umlykjandi landslagi sem þeir eiga leið um dagsdaglega.

2008-06-08T17:41:00.000-07:00

2.-23 ágúst 2008 START

2. ágúst 2008 kl. 14:00
Opnun á myndlistarsýningunni START í Verksmiðjunni

Þátttakendur:
Alexander Steig, Þýskalandi
Arna Valsdóttir, Íslandi
Boekie Woekie, Hollandi
Kristján Guðmundsson, Íslandi
Magnús Pálsson, Íslandi/Bretlandi
Nicolas Moulins, Frakklandi/ Þýskalandi
Sigga Björg Sigurðardóttir, Íslandi/Skotlandi

LISTASMIÐJUR

Listasmiðja barna og foreldra 3.ágúst 2008

Listasmiðja barna 9-10. ágúst 2008

Hér er um að ræða þrjár smiðjur með leiðsögn þriggja ólíkra listamanna.

Áhersla er lögð á að vinna með fjölbreytt efni og með ólíkum aðferðum. Þannig geta þátttakendur valið sér miðil eftir áhugasviði og getu í samráði við leiðbeinendur.

Þema smiðjunnar er framtíð, fegurð, samvinna. Hóparnir vinna með þessi þrjú hugtök í sitt hvoru lagi og koma svo saman í lok listasmiðjunnar sem eitt verk.

GRASRÓT 2008

20. september - 12. október 2008

ferskustu ræturnar í íslenskri myndlist, í samvinnu við Nýlistasafnið

Stefnt er að því að sýningin opni sömu helgi og Sjónlistahátíðin stendur yfir. Grasrót hefur áunnið sér sess sem árleg sýning framsæknustu myndlistarmanna yngstu kynslóðarinnar. Nýlistasafnið hefur haft veg og vanda af þessum sýningum og í fyrsta skipti er stefnt að því að sýningin fari fram utan höfuðborgarsvæðisins, í Verksmiðjunni á Hjalteyri.

Verksmiðjan
Menningarmiðstöð á Hjalteyri

Neðst á Hjalteyri // 601 Akureyri // 4611450 // http://www.verksmidjan.blogspot.com

Forsvarsmaður Gústav Geir Bollason 4611450

2008-06-08T17:03:00.001-07:00

Fréttatilkynning: Verksmiðjan - Menningarmiðstöð á Hjalteyri opnar í ágúst 2008

Verksmiðjan

Menningarmiðstöð á Hjalteyri

Neðst á Hjalteyri // 601 Akureyri // 4611450 // http://www.verksmidjan.blogspot.com

Hópur listamanna, þar af 9 búsettir í Arnarneshreppi, hafa gert með sér samkomulag um rekstur menningarviðburða og vinnuaðstöðu í gömlu Verksmiðjunni á Hjalteyri.

Undirbúningur hófst í október 2007 með hugmyndavinnu og nú hefur verið gert samkomulag við Arnarneshrepp um afnot af gömlu Verksmiðjunni.

Markmiðið er að efla menningarviðburði og ferðaþjónustu á svæðinu, samstarf við sveitarfélagið og skóla, og skapa vettvang fyrir listamenn á staðnum og vinna að nýsköpun í atvinnumálum á svæðinu. Stuðla þannig að jákvæðum búsetuskilyrðum á svæðinu.

Hafinn er undirbúningur fyrir fyrstu viðburðina í Verksmiðjunni og styrkir hafa fengist frá einkaaðilum, Menningarráði Eyþings og Impru, Nýsköpunarmiðstöð.

Aðstandendur hafa fjölbreytta þekkingu og reynslu við skipulagningu menningarviðburða, uppsetningu sýninga, námskeiða, bókaútgáfu og heimildamyndagerð.

Menningarhátíð á Hjalteyri í ágústmánuði

Sérstaða menningarhátíðarinnar á Hjalteyri í ágústmánuði verður að teljast umtalsverð einkum með tilliti til staðsetningar, aðstæðna og dagsskrár - óskildar því sem er almennt í boði úti um land á þessum tíma. Lögð er sérstök áhersla á að velja einstaka listamenn sem geta tekið mið af aðstæðum og nýtt þær sem möguleika. Staðarval og tímasetning ásamt vali á kunnum listamönnum ólíkra kynslóða og mismunandi listhreyfinga, munu hjálpast að og draga að hina áhugasömu og hugsanlega kaupendur slíkrar þjónustu í framtíðinni. Hátíðin - sem jafnframt er tilraun og undirbúningur til frekara framhalds - hæfist á mestu ferðamannahelgi þjóðarinnar og umhverfið og óvanalegar ytri aðstæður myndu spila inn í, hafa mótandi áhrif á skipulag og uppsetningu viðburða og vekja um leið forvitni. Ytri skilyrði og ástand húsakynna eru frumstæð en spilað verður inn á það og fegurð þeirra undirstrikuð. Aukreitis en öllu þessu samofið verður boðið upp á listasmiðju fyrir börn og unglinga sem einnig telst afar mikilvægur forsmekkur að því sem koma skal.

Ef svo fer að uppákoma þessi leiði til þess að Hjalteyrarverksmiðjan og umhverfi hennar verði framtíðarstaður listamanna þá væri sérstaða hennar í listheiminum veruleg. Hún yrði nokkurs konar frumbýli - listin nemur land - og brúaði með því bil á milli þéttbýlis og landsbyggðar en einnig lands-byggðar og umheims. Hún yrði hvortveggja í senn ; svæðisbundin og næði jafnframt til stærri heildar, þar sem hún myndi bæði taka mið af þörfum og áhuga íbúa næsta nágrennis en um leið opna gáttir til umheimsins fyrir tengsl sín og samstarf við erlenda aðila. Sjálft mun umhverfið og húsakynni Hjalteyrar-verksmiðjunnar vekja athygli, hafa áhrif á sköpun og móta starfsemina og framleiðsluþætti (atriði sem kann, skiljanlega, að vekja undrun þeirra sem hafa haft hana of lengi fyrir augunum). Strax frá og með menningarhátíð yrði unnið að endurbótum með tilliti til þess hvernig húsakynni eru í raun, samspil náttúruafla og mannvirkja höfð í huga og að leiðarljósi. Verksmiðjan yrði eitt listaverk út af fyrir sig.

Framleiðslan og þekkingin

Væntingar fólks til þessarar hátíðar og starfsemi á upphafsreit, mun fyrst og fremst verða mæld með tilliti til aðsóknar og viðbragða, ekki síst í formi umfjallana og fjölmiðlaathygli. Aðstandendur munu einnig standa fyrir öflugri kynningu.

Menningarleg þjónusta sem hér verður til og hátíðinni er ætlað að marka upphafið að mótast fyrir þörf ákveðins hóps listamanna til þess að skapa sér sameiginlegan vettvang og sjá sér hag í því. Slíkt fyrirkomulag á sér fjölmargar hliðstæður þar sem listamennirnir hafa vinnustofur sínar í einni þyrping og jafnframt aðstöðu til sýningahalds. Þar geta þeir komið eigin framleiðslu og annarra á framfæri. Í framtíðinni mun þjónustan meðal annars felast í því að listamennirnir geta opnað vinnustofur sínar og sýnt og haft á boðstólum verk sín, þeir munu bæði í sameiningu og einstaklingsbundið vinna að metnaðarfullri menningardagskrá og fjölbreyttri þar sem að samankomnir mynda þeir nokkurs konar banka tenginga og hugmynda sem allar fá að njóta sín. Þeir munu bjóða fram þjónustu sína til skóla, til barna og unglingastarfs og standa fyrir öflugu upplýsingastreymi og kynningarstarfi.

Allir þeir listamenn sem kallaðir eru til þátttöku á menningarhátíð að þessu sinni hafa vakið verðskuldaða athygli á sínu sviði, skipuleggjendur hafa allir hlotið framhaldsmenntun í listum og teljast hafa sérþekkingu á sviði lista og menningar. Þeir hafa reynslu af skipulagningu menningarviðburða, uppsetningu sýninga og störfum við kennslu og námskeiðahald.

2008-06-08T16:59:00.000-07:00

Stofnendur:

Aðalheiður S. Eysteinsdóttir, myndlistarmaður búsett í Freyjulundi, 601 Akureyri. Hefur unnið við myndmenntakennslu á öllum skólastigum, safnaleiðsögn, námskeiðshald, fyrirlestra og gallerírekstur. Hefur staðið fyrir 80 menningarviðburðum "á slaginu sex". Varaformaður Myndlistarfélagsins. Er á starfslaunum listamanna.

Arna Valsdóttir, myndlistarmaður og tónlistamaður, búsett á Akureyri. Hefur unnið myndbands- og hljóðinnsetningaverk. Hefur unnið við myndlistarkennslu á öllum skólastigum, námskeiðshald, fyrirlestra og tónlist.

Gústav Geir Bollason er myndlistamaður búsettur á Hjalteyri. Vinnur með teikningar og kvikmyndatengd málverk. Hann hefur starfað við kennslu í barnaskóla og framhaldsskóla, unnið við námskeið og haldið fyrirlestra. Er á starfslaunum listamanna.

Hlynur Hallsson, myndlistarmaður, búsettur á Akureyri. Hefur kennt myndlist á framhaldsskóla- og háskólastigi. Hefur skipulagt sýningar og staðið í blaðaútgáfu og rekið sýningarstaði. Formaður Myndlistarfélagsins. Í stjórn Kynningarmiðstöðvar íslenskrar myndlistar. Er á starfslaunum listamanna.

Jóna Hlíf Halldórsdóttir, myndlistarmaður, búsett á Akureyri. Hefur starfað við listasafnið á Akureyri, hefur umsjón með gestavinnustofunni í Listagilinu og hefur unnið við sýningarstjórn og rekur galleríBOX. Er varastjórnandi í Myndlistafélaginu.

Þórarinn Blöndal, myndlistarmaður, búsettur á Akureyri. Hefur unnið við leikhús, við uppsetningu sýninga og haldið námskeið. Meðstjórnandi í Myndlistafélaginu.

Nicolas Moulin er franskur myndlistamaður sem býr og starfar í Berlín. Vinnur með ljósmyndir, vídeó og skúlptúr innsetningar. Hann hefur fengist við kennslu á háskólastigi, haldið fyrirlestra og er einn af stofnendum « MARS » listamiðstöðvar í Berlín. Er einn af listamönnum í gallerí chez Valentin – París galleriechezvalentin.com

Clémentine Roy er frönsk myndlistakona sem býr og starfar í Berlín. Vinnur með kvikmyndir, ljósmyndir og líkön. Hún er einn af stofnendum «MARS » listamiðstöðvar í Berlín.

Véronique Legros er frönsk/belgísk myndlistakona búsett á Hjalteyri. Vinnur með ljósmyndir. Hún hefur fengist við námskeiðahald og starfað við kennslu. Er fastráðinn kennari við Listnámsbraut Verkmenntaskólans á Akureyri.

Jan Voss, búsettur í Amsterdam og á Hjalteyri, kennsla við listaháskóla víða um heim, fyrirlestrar, rekur bókverkabúðina Boekie Woekie og gallerý í Amsterdam, bókaútgefandi og prentari, náinn samstarfsmaður Dieter Roth, vel þekktur í Þýskalandi, Hollandi, Íslandi og Bretlandi, 40 ára reynsla af myndlist.

Rúna Þorkelsdóttir, búsett í Amsterdam, Reykjavík og á Hjalteyri, kennsla á grunnskólastigi, fyrirlestrar, rekur Boekie Woekie og gallerý í Amsterdam, bókaútgefandi og prentari, náinn samstarfsmaður Dieter Roth, 30 ára reynsla af uppsetningum stórra alþjóðlegra sýninga.

Henriette van Egten, búsett í Amsterdam og á Hjalteyri, rekur Boekie Woekie og gallerý í Amsterdam, bókaútgefandi og prentari, náinn samstarfsmaður Dieter Roth, 35ára reynsla af alþjóðlegu sýningarhaldi, gerð heimildamynda.

Kristján Guðmundsson, búsettur í Reykjavík og á Hjalteyri, einn af Íslands virtustu myndlistamönnum í 40 ár, kennsla við listaháskóla, fyrirlestrar, oft fengið starfslaun ríkisins og viðurkenningar, vel þekktur á norðurlöndunum, setið í ráðgjafanefndum.

Jón Laxdal Halldórsson, búsettur í Freyjulundi 601 Akureyri, kennsla í barnaskóla og myndlistaskóla, fyrirlestrar, námskeiðshald, ljóðskáld, bókaútgefandi og prentari, 28 ára reynsla af upphengingum sýninga, starfsmaður Listasafnsins á Akureyri frá stofnun, starfslaun frá Akureyrarbæ og ríkinu, staðið fyrir menningarviðburðum í 28 ár, virkur þátttakandi í uppbyggingu Listagilsins frá upphafi.

Arnar Ómarsson

Lene Zachariassen